Qazaqstanda turaqty turyp jatqan shetel azamattarynyń sany 212 myńǵa jetti. Bul týraly 22 shildede ótken úkimet otyrysynda ishki ister ministriniń birinshi orynbasary Baýyrjan Álenov málimdedi, dep habarlaidy Dalanews.kz.
Onyń aitýynsha, sońǵy úsh jylda elde turaqty turyp jatqan sheteldikter sany 42%-ǵa artqan. Al biylǵy jyldyń alǵashqy alty aiynda Qazaqstanǵa 7,5 million sheteldik kirgen. Bul ótken jylmen salystyrǵanda 600 myń adamǵa artyq. Kelgenderdiń 90%-yn TMD elderiniń azamattary quraidy.
Qai óńirlerde kóp qonystanǵan?
- Almatyda – 42 myń
- Almaty oblysynda – 32 myń
- Astana men Qaraǵandy oblystarynda – 17 myń
Sonymen qatar 430 myńnan astam shetel azamaty elde ýaqytsha turyp jatyr. Olardyń basym bóligi — 360 myńy — jumys isteýge kelgen. Qalǵandary otbasymen qosylý (17 myń), bilim alý (8 myń) jáne ózge maqsattarmen (44 myń) kelgen.
Kóshi-qon tártibi buzylǵan jaǵdaida ne bolady?
Baýyrjan Álenovtyń aitýynsha, sheteldikterdiń 97%-y zańdy saqtaidy. Alaida biyl kóshi-qon zańnamasyn buzǵany úshin 200 myń sheteldik ákimshilik jaýapkershilikke tartylǵan. Sonyń ishinde 10 myń adamǵa Qazaqstanǵa 5 jylǵa kirýge tyiym salyndy.
Vitse-ministr qylmystyq quqyqbuzýshylyq jasaǵan shetel azamattary da zań aiasynda jazalanatynyn erekshe atap ótti.
