TikTok juldyzyna aınalǵan №58 mektep-gımnazıasynyń dırektory Aqmonshaq Nurtaza qyzmetinen ketetinin málimdedi. Bul týraly ol Instagram paraqshasynda jazdy, dep habarlaıdy Dalanews.kz.
“Bárin toqtattym. Mektep, qyzmet, áleýmettik jeli”, – dedi ol.
Aıta keteıik, buǵan deıin Aqmonshaq Nurtaza TikTok jelisinde erekshe belsendiligimen kózge túsken edi. Ol 11-synyp túlekterimen birge Dımash Qudaıbergenniń oryndaýyndaǵy “Taý ishinde” ánine túsirilgen chellendjge qatysyp, vıdeosy 3,1 mıllıon qaralym jınaǵan. Nátıjesinde jeńimpaz atanyp, Dımashtyń Londonda ótetin konsertine joldama utyp aldy.
Aqmonshaq Nurtaza mektep ómirin áleýmettik jelide jıi nasıhattap, oqýshylarmen túrli vıdeorolık túsirip júrgen. Sondaı-aq jarnamalyq kontentterge de qatysyp, “dırektormen shaı” atty shaǵyn jobasyn júrgizip, joǵary synyp oqýshylarymen ashyq suhbat uıymdastyratyn.
Onyń bul áreketteri qoǵamda ekiudaı pikir týdyrdy. Biri ony jańashyl basshy dep qoldasa, endi biri mektep abyroıyna zıan keltiretin áreket dep synady.
Alaıda onyń qyzmetinen naqty qandaı sebeppen ketkeni belgisiz.
