Ýaqyt ótken saiyn álem memleketteri aldynda azyq-túlik qaýipsizdigi men aýyl sharýashylyǵy ónimderiniń tapshylyǵy sezilýde. Búginde dúniejúzinde jerdiń igiligin baǵalap, mańdai terin tógip, eńkeiip jumys isteitinder sany azaiýda. Tehnologiialyq úrdistiń jemisi sanalatyn daiyn jáne jartylai daiyn jasandy ónimge oiysyp bara jatqan búgingi jahandanǵan qoǵamda agrarlyq ǵylym men óndiriske, iri fermerlerden bastap usaq sharýaǵa deiin memlekettiń qamqorlyǵy asa qajet.
Qazaqstan agrarly memleket qataryna jatatyndyqtan, el ekonomikasyn órkendetý isinde basty salmaqtyń biri aýyl sharýashylyǵy mamandaryna túsetini sózsiz. Búgingi kúni atalǵan salada qyzmet etetin ǵalymdar men ónim óndirýshiler zaman talabyna sai birlese jumys isteýdiń nátijeli bolatynyn túsinip otyr. Osy oraida, 10 sáýir kúni Qazaq Ulttyq agrarlyq ýniversitetinde QR Aýyl sharýashylyǵy ministri Asyljan Mamytbekovtyń qatysýymen Qazaqstannyń agrarlyq salasyn innovatsiialyq baǵytta keshendi damytý, ǵylymi jańalyqtardy óndiriske engizý, investitsiia tartý jáne aýyl sharýashylyǵyna bilikti mamandar daiarlaý máselelerine arnalǵan keńeitilgen keńes ótti. Otandyq agrarlyq bilim men ǵylymnyń kóshbasshysy sanalatyn ne arnaiy kelgen ministr aldymen oqý ornynyń ǵalymdary men ǵylymi-zertteý institýttary mamandarynyń ǵylymi-óndiristik jetistikterin pash etken kórme jumysymen tanysyp, jýrnalisterdiń suraqtaryna jaýap berdi.
Elimizdiń agrarshy mamandary bas qosqan keleli keńes jumysy Aýyl sharýashylyǵy ministri Asyljan Mamytbekovtyń kirispe sózimen bastaldy. Ýniversitet rektory, QR UǴA vitse-prezidenti, akademik Espolov Tilektes Isabaiuly agrarlyq bilim men ǵylymnyń, agroónerkásiptik keshenniń qazirgi jai-kúii men keleshegin saralaǵan jan-jaqty baiandama jasap, naqty usynys-pikirlerin ortaǵa saldy.
Jiynǵa QR Aýyl sharýashylyǵy ministrligi men aýyl sharýashylyǵyna mamandanǵan joǵary oqý oryndary basshylary, elimizdegi aýyl sharýashylyǵymen ainalysatyn kompaniia basshylary men ǵylymi-zertteý institýttarynyń ǵalymdary, sharýashylyq jetekshileri, agrarlyq salanyń ózge de bilikti mamandary, QazUAÝ oqytýshy-ǵalymdary jáne birqatar buqaralyq aqparat quraldarynyń ókilderi qatysty.
Asyljan Mamytbekov, QR Aýyl sharýashylyǵy ministri:
– Qazaqstan úshin Aýyl sharýashylyǵy salasy ekonomikanyń mańyzdy bólshegi sanalady. Memleket basshysy N.Á.Nazarbaev agroónerkásiptik erekshe mán berip, agrarlyq sala mamandaryna jańa talaptar men mindetter júktep otyr. Bul rette biz innovatsiialyq jobalardy tiimdi júzege asyratyn, ǵylymi jańalyqtarymyzdy óndiriske engizip, halyqtyń igiligine jaratatyn bilikti kadrlar máselesine airyqsha den qoiyp kelemiz. Óitkeni biz otandyq agrarlyq bilim men ǵylymdy halyqaralyq standarttarǵa sáikestendirý arqyly Qazaqstannyń agrarlyq saladaǵy ǵylymi óndirisiniń ónimderin álemdik naryqqa shyǵarýǵa kúsh salýymyz qajet. Osy oraida sapaly bilim beretin agrarlyq joǵary oqý oryndarynyń atqaratyn róli óte mańyzdy. Qazaq ulttyq agrarlyq ýniversitetiniń ǵalymdary aýyl sharýashylyǵy salasyndaǵy kóptegen mańyzdy jobalarǵa atsalysyp, elimizdiń agroónerkásiptik keshenine zamanǵa laiyq mamandar daiyndaý isinde aitarlyqtai ilgeri qadamdar jasap keledi.
Tilektes Espolov, QazUAÝ rektory, QR UǴA vitse-prezidenti, akademik:
– Keńeitilgen májilistiń maqsaty – Elbasymyzdyń agrarlyq sala aldynda qoiyp otyrǵan strategiialyq mindettemelerin júzege asyrý. Osy baǵytta el ekonomikasyn órkendetýde aýyl sharýashylyǵy salasynyń mańyzyn arttyryp, ǵylym men óndiristiń ózara bailanysyna tyń serpin berip, tájiribe almasý. Osy oraida biz Aýyl sharýashylyǵy ministrligi mamandarymen, ǵalymdarmen birlese otyryp aýyl sharýashylyǵyna qatysty problemalardy talqylap, naqty usynystar ázirlemekpiz.
Qazirgi ýaqytta aýyl sharýashylyǵy ǵylymy men óndirisine innovatsiialyq tehnologiialardy igergen, bilimdi de bilikti jastardy kóptep tartýymyz qajet. Búgingi kúni elimizde ǵylymmen ainalysýǵa jańa múmkindikterge jol ashylýda. Sondyqtan biz agrarlyq ǵylym, bilim jáne óndirisiniń jáne agrarlyq joǵary oqý oryndary men ǵylymi-zertteý institýttarynyń integratsiiasyn damytý jolynda birlesip jumys atqarýǵa tiispiz. Men bilim, ǵylym jáne óndiris salasynda birigip, yntymaqty jumys isteýdiń tiimdi baǵyttaryn tabatynymyzǵa senemin.
QazUAÝ Baspasóz qyzmeti,
Sýrettti túsirgen M.Botabekov
