Biznes ókilderiniń «Atameken» kásipkerler palatasyna degen qarsylyǵy týraly aqparattar ár jerden aityla bastady. Bul uiymnyń óz ýaqytynda qajet bolǵany ras, biraq kásipkerlerdiń máselesin sheshý maqsatyndaǵy missiiasyn aiaqtalyp keledi,bul uiymnan qaiyr joq, degen sózder kóbeidi. Biznesmenderdiń quqyǵyn da, múddesin de qorǵamaityn boldy. Endeshe qyrýar jarnany tóleýdiń ne qajeti bar, dep málimdegender de barshylyq. Bul týraly DALA INSIDE keshe jazǵan bolatyn. Al sońǵy jyldary «Atamekende» qyzmet etip, qazir ózge uiymdarǵa ketip jatqan mamandardyń úlken armiiasy qalyptasty. Ásirese, ózderin «kásipkerler partiiasy» dep júrgen Respublica qoǵamdyq birlestiginde qazir eks-atamekendikterdiń úlken shoǵyry qalyptasqan.
Palatadan partiiaǵa jóńkile kóshý naýqany bir jyl buryn bastalypty. Sebebi partiianyń ortalyq apparatynda eleýli ózgerister bolyp, basshylyq quramy aýysqan edi. Jańa kelgen apparat quramyn kásipkerlermen jumys istei alatyndar jáne olardan partiia janynan qurylǵan korporativtik qorǵa qarjy tartatyn adamdarmen jasaqtaý mindetin qoiǵan deidi senimdi derekkóz.
Sóitip 2024 jyldyń qarashasynda Áshmetovtiń partiiaǵa kelýi atamekendikterdiń Respublica-ǵa jappai aýysýyna jolyn ashty. Kásipkerler palatasynan kásipkerler partiiasyna topyrlap kelgenderge álbette túrli ýáde berilgen siiaqty. Sonyń biri – saiasi karera bolýy múmkin. Jergilikti kóp deńgeili Máslihattarǵa, Parlamentke tipti sailanbaly jolmen ótetin aýyldyq, aýdandyq ákimdikterge jol ashylatyn jalǵyz jol - partiiaǵa kelý dep sendirgen. Taǵaiyndaý kezinde óńirlerdegi filialdardyń jańa basshylaryna "óziń qoja, óziń bisiń" deýdi de umytpapty. Eń basty talap óz-ózin qarjylandyrý, ortalyq apparatqa qol jaimasańdar boldy degendi de eskertken syńaily.
Jańa jyldan keiin de partiianyń filialdarynda kadrlyq aýys-túiis jalǵasqan. Atamekenniń qurdymǵa ketetinin sezgender áli de partiiaǵa aýysýyn toqtatpady.
Shyǵys Qazaqstan oblystyq filialyna 64 jastaǵy Áliia Muqasheva bardy. Óńirdegi kásipkerler palatasynda eńbek etken, Óskemendegi yqpaldy biznesmenniń jubaiy da buryn partiiada da, memlekettik qyzmette de istep kórmegen edi.
El Naýryz merekesin toilaýǵa kóshkende pariianyń ortalyq apparatyndaǵy qos fýnktsioneri batysqa bet aldy. Aqtóbede olardy Atamekenniń oblystaǵy basshysy Dana Bekbaýova kútip otyrǵan. Jyly ornyn, ondaǵan adamy bar jumysyn tastap bir-ǵana mamany bar filialǵa basshylyqqa ol da jaiǵasty.
Palatadan partiiaǵa betburǵan «uly kósh» munymen toqtamady. Óńirdegi ókildikke eńbek etý úshin qatardaǵy qarapaiym mamandar da kelip jatty. Álibek Áshmetov óz qolastynda jumys istegen qyz-jigitterdi partiia filialdary men ortalyq apparatqa áli de ákelip jatyr. Jaqynda eń iri Almaty fililyn basqarýǵa biznesvýmen Sholpan Ábdihalyqova taǵaiyndalǵan. Al onyń janyna maman bolyp Atamekende istegen Áshimetovtiń kómekshisi Abzal degen jas jigit jumysqa ornalasty.
Al Respublica qoǵamdyq birlestiginiń ortalyq apparatynda BAQ-pen bailanysqa jaýapty qyzmetkerge partiia týraly, onyń biýdjetten qansha qarajat alatyny, múshe sany týraly suraý salǵanbyz. Ázirge jaýap bolmady.
