بيزنەس وكىلدەرىنىڭ «اتامەكەن» كاسىپكەرلەر پالاتاسىنا دەگەن قارسىلىعى تۋرالى اقپاراتتار ءار جەردەن ايتىلا باستادى. بۇل ۇيىمنىڭ ءوز ۋاقىتىندا قاجەت بولعانى راس، ءبىراق كاسىپكەرلەردىڭ ماسەلەسىن شەشۋ ماقساتىنداعى ميسسياسىن اياقتالىپ كەلەدى،بۇل ۇيىمنان قايىر جوق، دەگەن سوزدەر كوبەيدى. بيزنەسمەندەردىڭ قۇقىعىن دا، مۇددەسىن دە قورعامايتىن بولدى. ەندەشە قىرۋار جارنانى تولەۋدىڭ نە قاجەتى بار، دەپ مالىمدەگەندەر دە بارشىلىق. بۇل تۋرالى DALA INSIDE كەشە جازعان بولاتىن. ال سوڭعى جىلدارى «اتامەكەندە» قىزمەت ەتىپ، ءقازىر وزگە ۇيىمدارعا كەتىپ جاتقان مامانداردىڭ ۇلكەن ارمياسى قالىپتاستى. اسىرەسە، وزدەرىن «كاسىپكەرلەر پارتياسى» دەپ جۇرگەن Respublica قوعامدىق بىرلەستىگىندە ءقازىر ەكس-اتامەكەندىكتەردىڭ ۇلكەن شوعىرى قالىپتاسقان.
پالاتادان پارتياعا جوڭكىلە كوشۋ ناۋقانى ءبىر جىل بۇرىن باستالىپتى. سەبەبى پارتيانىڭ ورتالىق اپپاراتىندا ەلەۋلى وزگەرىستەر بولىپ، باسشىلىق قۇرامى اۋىسقان ەدى. جاڭا كەلگەن اپپارات قۇرامىن كاسىپكەرلەرمەن جۇمىس ىستەي الاتىندار جانە ولاردان پارتيا جانىنان قۇرىلعان كورپوراتيۆتىك قورعا قارجى تارتاتىن ادامدارمەن جاساقتاۋ مىندەتىن قويعان دەيدى سەنىمدى دەرەككوز.
پارتيانىڭ ورتالىق اپپاراتىن باسقارۋعا پارتيا ءتوراعاسى بۇرىن پرەزيدەنت اكىمشىلىگىندە جۇمىس ىستەگەن، بىرنەشە وبلىستا اكىم اپپاراتىنا جەتەكشىلىك ەتكەن جانات ىسقاقوۆ دەگەن ازاماتتى الىپ كەلدى. ول «اتامەكەن» ۇيىمىندا ىستەگەن، سولتۇستىك قازاقستان وبلىسىندا فيليال باسقارعان، ەسەسىنە پارتيادا ءبىر كۇن دە جۇمىس ىستەپ كورمەگەن الىبەك اشمەتوۆ دەگەن ادامدى ورىنباسارى ەتىپ تاعايىندايدى. ونىڭ باستى ميسسياسى – ەكى جىلدان بەرى جۇمىس ىستەپ كەلگەن پارتيا فيليالىنىڭ جەتەكشىلەرىن اۋىستىرۋ بولعان سياقتى. جۇكتەلگەن مىندەتتى ورىنداۋ ءۇشىن اپپارات باسشىسى مەن ونىڭ وڭىرلەرگە جاۋاپتى ورىنباسارى ەڭبەك كەلىسىمشارتتارىن ءبىرجاقتى توقتاتۋ جولىمەن وڭتۇستىك، باتىس جانە شىعىستاعى ونداعان وكىلدىكتىڭ باسشىلارىن جۇمىستان كەتىردى دەيدى دەرەكسوز. ساياسي ۇيىمنىڭ العاشقى كۇنىنەن جۇرگەن، سايلاۋ ناۋقانىندا بەلسەندى بولعان قىزمەتكەرلەردىڭ بارلىعى باسقا سالاعا كەتۋگە ءماجبۇر بولدى. پارتيادا ساباقتاستىق نەمەسە كادردى ىشتەن تاربيەلەپ ءوسىرۋ قاعيداتى ساقتالماپتى. ساياسي ۇيىمعا جۇمىسقا شاقىرىلعاندا وسىنداي ۋادە بەرىلگەنىمەن ايداربەك قوجانازاروۆ پارتيانىڭ اپپاراتىن باسقارۋعا كەلگەن جاڭا ادامدارعا بۇل جاعىن ەسكەرتپەگەن بولۋى كەرەك.
ءسويتىپ 2024 جىلدىڭ قاراشاسىندا اشمەتوۆتىڭ پارتياعا كەلۋى اتامەكەندىكتەردىڭ Respublica-عا جاپپاي اۋىسۋىنا جولىن اشتى. كاسىپكەرلەر پالاتاسىنان كاسىپكەرلەر پارتياسىنا توپىرلاپ كەلگەندەرگە البەتتە ءتۇرلى ۋادە بەرىلگەن سياقتى. سونىڭ ءبىرى – ساياسي كارەرا بولۋى مۇمكىن. جەرگىلىكتى كوپ دەڭگەيلى ءماسليحاتتارعا، پارلامەنتكە ءتىپتى سايلانبالى جولمەن وتەتىن اۋىلدىق، اۋداندىق اكىمدىكتەرگە جول اشىلاتىن جالعىز جول - پارتياعا كەلۋ دەپ سەندىرگەن. تاعايىنداۋ كەزىندە وڭىرلەردەگى فيليالداردىڭ جاڭا باسشىلارىنا "ءوزىڭ قوجا، ءوزىڭ ءبيسىڭ" دەۋدى دە ۇمىتپاپتى. ەڭ باستى تالاپ ءوز-وزىن قارجىلاندىرۋ، ورتالىق اپپاراتقا قول جايماساڭدار بولدى دەگەندى دە ەسكەرتكەن سىڭايلى.
ساياسي پارتيانىڭ رەسمي اككاۋنتتارىنداعى مالىمەت بويىنشا، قوستاناي وبلىستىق فيليالىنا «اتامەكەننىڭ» وڭىردەگى فيليالىندا قىزمەت اتقارعان مانارا مادينينا، قىزىلوردا وبلىستىق فيليالىنا ايماقتاعى كاسىپكەرلەر پالاتاسى ديرەكتورىنىڭ ورىنباسارى بولعان داۋرەن سەيتجانوۆ، اباي وبلىسىنداعى «اتامەكەندە» قىزمەت ەتكەن سايات بوكيشيەۆ پارتيانىڭ ورتالىق اپپاراتىنا ءبولىم جەتەكشىسى بولىپ تاعايىندالدى. ءدال وسى كۇنى بوكيشيەۆپەن بىرگە ورتالىق اپپاراتقا ايدانا توعىزبايەۆا دا قىزمەتكە تاعايىندالدى. ول دا «اتامەكەندە» ايەلدەر كاسىپكەرلىگى جونىندە دەپارتامەنتتى باسقارعان. ول اپپارات باسشىسىنىڭ ايەلدەر ءىسى جونىندەگى كەڭەسشىسى بولدى.
اتامەكەننەن كەلىپ، پارتياعا مۇشە تارتۋ جاعىنان بەلسەندىلىك تانىتقانىڭ ءبىرى - ايدانا. ول جۇزدەگەن كاسىپكەر ايەلدى ReWomen دەگەن جوباعا تارتىپ، پارتياداعى نازىك جاندىلاردىڭ سانى مەن ساپاسىن ءبىرشاما كوتەردى دەۋگە بولادى. ولاردىڭ بارلىعى بيزنەسپەن بىرگە بيلىك تارماقتارىنا، سونىڭ شىنىدە پارتيا جولىمەن كوتەرىلۋدەن دامەلى، البەتتە. ءقازىر ساياسي ۇيىمداعى ەڭ بەلسەندى بلوك - ReWomen.
جاڭا جىلدان كەيىن دە پارتيانىڭ فيليالدارىندا كادرلىق ءاۋىس-تۇيىس جالعاسقان. اتامەكەننىڭ قۇردىمعا كەتەتىنىن سەزگەندەر ءالى دە پارتياعا اۋىسۋىن توقتاتپادى.
شىعىس قازاقستان وبلىستىق فيليالىنا 64 جاستاعى ءاليا مۇقاشيەۆا باردى. وڭىردەگى كاسىپكەرلەر پالاتاسىندا ەڭبەك ەتكەن، وسكەمەندەگى ىقپالدى بيزنەسمەننىڭ جۇبايى دا بۇرىن پارتيادا دا، مەملەكەتتىك قىزمەتتە دە ىستەپ كورمەگەن ەدى.
كوپ ۇزاماي ىسقاقوۆ پەن اشمەتوۆ جەتىسۋ وبلىسى مەن الماتى وبلىسىنا ءىسساپارعا اتتاندى. تالدىقورعاندا كاسىپكەر، اتامەكەن ۇيىمىنىڭ وڭىرلىك كەڭەس مۇشەسى سايران جاسۇلان ۇلى دەگەن ازامات فيليالعا جەتەكشى بولدى. ال قونايەۆتا الماتى وبلىستىق اتامەكەن فيليالى ديرەكتورىنىڭ ورىنباسارى ەرجان دۇيسەكەنوۆ وڭىرلىك فيليالعا ءتوراعا بولۋعا ءبىراز ويلانىپ كەلىسىم بەرگەن. اشمەتوۆتىڭ بۇرىنعى ارىپتەسى وسىلايشا اتامەكەننەن پارتياعا اۋىستى. بۇل جەردە دە ساياسي مانساپ تۋرالى كەلىسىمدەر بولعانعا ۇقسايدى.
ەل ناۋرىز مەرەكەسىن تويلاۋعا كوشكەندە پاريانىڭ ورتالىق اپپاراتىنداعى قوس فۋنكسيونەرى باتىسقا بەت الدى. اقتوبەدە ولاردى اتامەكەننىڭ وبلىستاعى باسشىسى دانا بەكباۋوۆا كۇتىپ وتىرعان. جىلى ورنىن، ونداعان ادامى بار جۇمىسىن تاستاپ ءبىر-عانا مامانى بار فيليالعا باسشىلىققا ول دا جايعاستى.
پالاتادان پارتياعا بەتبۇرعان «ۇلى كوش» مۇنىمەن توقتامادى. وڭىردەگى وكىلدىككە ەڭبەك ەتۋ ءۇشىن قاتارداعى قاراپايىم ماماندار دا كەلىپ جاتتى. الىبەك اشمەتوۆ ءوز قولاستىندا جۇمىس ىستەگەن قىز-جىگىتتەردى پارتيا فيليالدارى مەن ورتالىق اپپاراتقا ءالى دە اكەلىپ جاتىر. جاقىندا ەڭ ءىرى الماتى فيليلىن باسقارۋعا بيزنەسۆۋمەن شولپان ءابدىحالىقوۆا تاعايىندالعان. ال ونىڭ جانىنا مامان بولىپ اتامەكەندە ىستەگەن اشىمەتوۆتىڭ كومەكشىسى ابزال دەگەن جاس جىگىت جۇمىسقا ورنالاستى.
وسىنداي "كادرلىق ساياساتتاعى جانە ايماقتاردى نىعايتۋعا ۇلەس قوسقانى ءۇشىن" الىبەك اشىمەتوۆ پارتيا ءتوراعاسىنىڭ قولىنان “قازاقستان كونستيتۋسياسىنا 30 جىل” دەگەن مەدالمەن ماراپات الىپ، ءوزىنىڭ الەۋمەتتىك جەلىدەگى پاراقشاسىندا بىلاي دەپ جازبا قالدىردى: “قازاقستان رەسپۋبليكاسى كونستيتۋسياسىنىڭ 30 جىلدىعىنا ارنالعان مەدال الۋ – زور مارتەبە. ەڭبەگىمدى باعالاپ، قولداۋ كورسەتكەن باسشىلىققا العىسىمدى بىلدىرەمىن”.
ال Respublica قوعامدىق بىرلەستىگىنىڭ ورتالىق اپپاراتىندا باق-پەن بايلانىسقا جاۋاپتى قىزمەتكەرگە پارتيا تۋرالى، ونىڭ بيۋدجەتتەن قانشا قاراجات الاتىنى، مۇشە سانى تۋرالى سۇراۋ سالعانبىز. ازىرگە جاۋاپ بولمادى.
