Túrkistan oblysynda 2025 jyly avtomobil joldary salasyn damytý maqsatynda 1 235,6 shaqyrym jol men kóshelerge qurylys-jóndeý jumystary júrgiziledi dep josparlanǵan. Jyl qorytyndysymen 951,4 shaqyrymy paidalanýǵa beriledi dep kózdelýde. Bul jaiynda Túrkistan oblysynyń jolaýshylar kóligi jáne avtomobil joldary basqarmasynyń basshysy Qýatjan Jumataev BAQ ókilderimen ótken brifingte málimdedi, dep habarlaidy Dalanews.kz
«Qazirgi tańda oblystyq mańyzy bar 225,2 shaqyrym joldyń qurylys-jóndeý jumystary júrip jatyr. Odan bólek, aýdandyq mańyzy bar 130,7 shaqyrym kóshege, eldi mekenderdegi 885,6 shaqyrym jolǵa jóndeý jumystary júrgizilýde. Sondai-aq, «Aýyl – el besigi» baǵdarlamasy aiasynda 140 eldi mekende jalpy uzyndyǵy 395,5 shaqyrym kóshede qurylys jumystary júrgiziledi. Biyl jyl qorytyndysymen jergilikti mańyzy bar joldardyń jaqsy jáne qanaǵatty jaǵdaidaǵy úlesin 94,7%-ǵa jetkizý josparlanǵan. Qurylys jumystarynyń sapasy «Ulttyq jol aktivteri sapasy ortalyǵy» RMK TO filialynyń turaqty baqylaýynda», - dedi spiker.
Sonymen qatar, basqarma tarapynan qarjylandyrýdy qajet etetin 4 kópir jáne jalpy uzyndyǵy 132,6 shaqyrymdyq 7 joldy kúrdeli jóndeýden ótkizý jobasy ázirlenip, saraptama qorytyndysy alynǵan. Odan bólek, jańadan 33,4 shaqyrym jolǵa joba ázirlenýde. Aita keterligi, Túrkistan oblysy aýmaǵynda avtomattandyrylǵan ólsheý stantsiialaryn ornatýǵa 7 jol aimaǵy belgilengen. 2024-2025 jyldary Arys qalasyndaǵy Arys-Temirlan, Arys-Qabylsai joldaryna ornatyldy. Biyl Sairam aýdanynda Qaramurt-Aqsýkent avtomobil jolynyń boiyna 2 jerge atalǵan stantsiiany ornatýǵa qarjy qaraldy. Qazirgi tańda merdiger mekeme anyqtalyp, jumystar bastalǵan.
