Mańǵystaý oblysynda álemge áigili akter Djeki Channyń qatysýymen túsiriletin «Dospehi Boga 4: Ýltimatým» halyqaralyq kino jobasynyń túsirilimi bastaldy. Jobany Sálem Entertainment jáne Dala Edge Creative Tech Park kompaniialary júzege asyrýda, dep habarlaidy dalanews.kz.
Qazirgi tańda túsirilim toby Mańǵystaýdyń biregei tabiǵi landshafttarynda alǵashqy kadrlardy taspaǵa túsirýde. Filmniń negizgi túsirilim alańdarynyń biri retinde álemge tanymal Bozjyra shatqaly tańdalǵan. 7-12 maýsym aralyǵynda atalǵan aýmaqta 35 adamnan turatyn túsirilim toby jumys júrgizip, filmniń birqatar kórinisterin túsirdi.
Mańǵystaý oblysynyń ákimi Nurdáýlet Qilybai shyǵarmashylyq top ókilderimen kezdesip, halyqaralyq aýqymdaǵy kino jobany júzege asyrýǵa jan-jaqty qoldaý bildirdi. Kezdesý barysynda óńirde kreativti indýstriiany damytý, kino jáne televiziialyq jobalardy óndirý, jastarǵa arnalǵan sapaly mediakontent qalyptastyrý, sondai-aq Mańǵystaýdyń týristik jáne mádeni áleýetin halyqaralyq deńgeide nasihattaý máseleleri talqylandy.
– Mańǵystaý kinoindýstriia salasyndaǵy aýqymdy jobalardy júzege asyrýǵa qolaily óńir. Biz kreativti ekonomikany damytýǵa, mádeni murany nasihattaýǵa jáne óńirdiń týristik tartymdylyǵyn arttyrýǵa baǵyttalǵan bastamalarǵa jan-jaqty qoldaý kórsetýge daiynbyz. Mundai jobalar Mańǵystaýdy halyqaralyq deńgeide tanytyp, óńirdiń áleýetin keńinen kórsetýge múmkindik beredi, – dedi oblys ákimi Nurdáýlet Qilybai.
Atalǵan joba otandyq kinoindýstriia úshin mańyzdy oqiǵa sanalady. Ol ishki týrizmdi halyqaralyq deńgeide ilgeriletýge jańa múmkindikter ashady. Óńirdiń biregei tabiǵi jáne tarihi nysandarynyń halyqaralyq kino jobada kórinis tabýy milliondaǵan kórermenniń nazaryn aýdaryp, týrizmniń damýyna, investitsiialyq tartymdylyqtyń artýyna jáne óńir men elimizdiń halyqaralyq bedeliniń nyǵaiýyna yqpal etedi.
Túsirilim jumystary biyl aiaqtalady dep josparlanýda, al filmniń prokatqa shyǵýy 2027 jyldyń aqpan aiyna belgilengen.
