Májilis depýtaty Ermurat Bapı buǵan deıin oıyn bıznesi salasyna baılanysty memlekettik organdarǵa joldaǵan depýtattyq saýalyna qatysty túsinikteme jarıalady. Bul týraly halyq qalaýlysy óziniń resmı paraqshasynda málimdedi, dep habarlaıdy Dalanews.kz
Depýtattyń aıtýynsha, onyń saýalyna baılanysty keıbir buqaralyq aqparat quraldary men ınternet-resýrstar jarıalaǵan orys tilindegi materıaldarda naqty derekter burmalanyp ketken. Sol sebepti Ermurat Bapı resmı túsiniktemesin eki tilde — qazaq jáne orys tilderinde berýdi jón kórgen.
«Resmı qujat úlgisindegi saýaldy baspasózde mazmundaý kezinde uqyptylyq qajet. Sebebi burmalanǵan derek qoǵamda qate pikir qalyptastyrýy múmkin», — dedi depýtat.
Ermurat Bapıdiń aıtýynsha, qosymsha zertteý men ýákiletti organdarmen júrgizilgen konsýltasıalar nátıjesinde Biryńǵaı esep júıesine (BEJ) qatysty buǵan deıin taratylǵan keıbir aqparattar naqtylanýdy qajet etetini anyqtalǵan.
Resmı derek boıynsha, jobanyń pılottyq kezeńi 2024 jylǵy 15 tamyzda iske qosylǵan. Júıe jasandy ıntellekt arqyly kúnine 800-ge jýyq zańsyz ınternet-saıttardy avtomatty túrde buǵattaı alady. Buǵan deıin mundaı jumystardy memlekettik organdar qolmen júrgizip, ol alty aıǵa deıin sozylatyn.
Bapıdiń málimetinshe, BEJ jobasynyń negizgi maqsaty — qazaqstandyq oıyn bıznesi salasynda ashyq ári senimdi sıfrlyq orta qalyptastyrý, zańsyz onlaın-kazıno men býkmekerlik saıttardy anyqtap, buǵattaý.
Júıeniń memlekettik operatory – Mádenıet jáne sport mınıstrligine qarasty «Operator ESÝ» JSHS, ol 100% memleket menshigindegi uıym bolyp tabylady. Barlyq serverler «Ulttyq aqparattyq tehnologıalar» AQ ınfraqurylymynda ornalasqan, sondyqtan derekterdiń syrtqa taralý qaýpi joq.
Sonymen qatar depýtat aldaǵy ýaqytta zańnamalyq túzetýler engiziletinin atap ótti. Jańa normaǵa sáıkes, býkmekerlik kompanıalar aınalymynyń 3%-yn áleýmettik jáne sporttyq jobalardy qoldaýǵa baǵyttaıtyn bolady:
-
1% — «Qazaqstan halqyna» qoǵamdyq qoryna;
-
1% — sportty damytýǵa arnalǵan «SportQory» qoryna;
-
1% — Ulttyq olımpıada komıteti janyndaǵy qorǵa aýdarylady.
Ermurat Bapı mundaı sharalar halyqaralyq tájirıbege negizdelgenin jáne salanyń ashyqtyǵyn arttyrýǵa, kóleńkeli aınalymdy azaıtýǵa baǵyttalǵanyn atap ótti.
«Men ýákiletti organdarmen birge júıeniń iske asýyn ári qaraı da baqylap, azamattardy onyń nátıjeleri týraly habardar etip otyramyn», — dedi Májilis depýtaty.
