Tájikstan prezidenti Emomali Rahmon TMD memleketteri basshylarynyń sammiti barysynda óz uly Rýstam Emomalidi eldiń bolashaq basshysy retinde beiresmi túrde tanystyrdy, dep habarlaidy Dalanews.kz "Evraziiskii brifing" sarapshylaryna silteme jasap.
Bul qadamnyń maqsaty – Tájikstannyń negizgi saiasi jáne ekonomikalyq seriktesteri, ásirese Resei tarapynan qoldaý alý edi.
"Rahmon bilikti ákeden ulǵa beibit ári boljamdy túrde ótkizýge umtylyp otyr. Sol úshin ol eldegi oppozitsiialyq kúshter men ózine adal emes saiasi jáne ekonomikalyq elitalardy álsiretýge tyrysyp keledi. Mundai toptar bilik tranzitine kedergi keltirýi nemese ony kúrdelendirýi múmkin", - deidi sarapshylar.
Bilik aýysýy Tájikstanda ne merziminen buryn ótetin prezident sailaýy arqyly, ne 2027 jyly qazirgi prezidenttiń ókilettik merzimi aiaqtalǵan soń júzege asýy múmkin.
Rýstam Emomalidiń mansaby ákesiniń jolyn jalǵastyrýǵa baǵyttalǵan. Ol eńbek jolyn Tájikstan syrtqy ister ministrliginiń qurylymdarynda bastap, keiin keden qyzmetin, sybailas jemqorlyqqa qarsy agenttikti jáne investitsiia men memlekettik múlik jónindegi komitetti basqardy.
Qazir Rýstam Emomali 2017 jyldan beri Dýshanbe qalasynyń meri, al 2020 jyldan bastap Madjlisi Millidiń tóraǵasy qyzmetin atqarady. Bul laýazym oǵan eldegi ekinshi tulǵa mártebesin beredi. Konstitýtsiiaǵa sáikes, eger memleket basshysynyń ókilettigin atqarý múmkindigi joiylsa, prezidenttiń ókilettigi tolyq Rýstam Emomalige ótedi.
Sońǵy jyldary Emomali Rahmon ulyn belsendi túrde saiasatqa shyǵaryp, halyqaralyq deńgeide tanystyryp júr. 2025 jyldyń ortasynda Rýstam Emomali Reseige jumys saparymen baryp, prezident ákimshiliginiń joǵary laýazymdy ókilderimen kezdesti.
Baqylaýshylardyń pikirinshe, osy sapar barysynda Emomali Máskeýden bilik tranzitine qatysty strategiialyq qoldaý alǵan. Resei ákeden ulǵa bilik berý shemasyn qoldaityny týraly boljamdar naýryz aiynda Vladimir Pýtin men Emomali Rahmon arasyndaǵy beiresmi kelissózderden keiin kúsheie tústi.
Rýstam Emomalidi TMD sammitinde murager retinde tanystyrýdan keiin, endigi basty másele - bilikti qashan jáne qandai jaǵdaida tapsyrý bolmaq. Bul protsess Tájikstanda dinastiialyq sabaqtastyqty zańdy túrde bekitip, aimaqtaǵy turaqtylyq pen boljamdylyqty qamtamasyz etýge baǵyttalǵan.
73 jastaǵy Emomali Rahmon 1992 jyldan beri eldi úzdiksiz basqaryp keledi. Sarapshylar onyń bilik tranzitin jedeldetý týraly sheshimin ishki jáne syrtqy faktorlardyń jiyntyǵymen bailanystyrady. El ishinde ol óz murasyn saqtap qalýǵa tyrysyp jatsa, syrtqy saiasatta Ortalyq Aziiadaǵy turaqsyzdyq pen geosaiasi qysym Dýshanbe biligin uzaq merzimdi jáne boljamdy saiasat ustanýǵa májbúrlep otyr.
Osylaisha, Emomali Rahmonnyń ulyn murager retinde ashyq tanystyrýy – Tájikstandaǵy bilik júiesinde sabaqtastyqtyń naqty ornaǵanyn jáne bul baǵyttyń balamasy joq ekenin aiqyndaǵan saiasi belgi boldy.
