Qazaqstanda qoljetimdi baǵamen satylatyn dári-dármekterdiń túr-túri azaiyp barady. Farmatsevtikalyq qyzmetti qoldaý jáne damytý qaýymdastyǵynyń dereginshe, sońǵy eki jylda elimizde tirkelgen preparattardyń tórtten biri naryqtan joǵalyp, al arzan dárilerdiń úlesi úshten birine qysqarǵan. Densaýlyq saqtaý ministrligi bul úrdisti toqtatý úshin arnaiy sharalar ázirleýde, dep habarlaidy Dalanews.kz.
Zakon.kz málimetinshe, qaýymdastyq prezidenti Marina Dýrmanova meditsinalyq týrizmge arnalǵan forýmda saladaǵy jaǵdaiǵa taldaý usynǵan. Onyń aitýynsha, dárihanalardaǵy preparattardyń naqty sany 25,5%-ǵa tómendegen – 2023 jyly 7 932 bolsa, qazir 5 907-si ǵana qalǵan.
"Baǵasy 1 000 teńgege deiingi dárilerdiń sany 34,5%-ǵa qysqardy. Bul keibir arzan dárilerdiń múlde naryqtan ketkenin bildiredi. Olardyń ornyn qazir qymbat djenerikter basty. Arasynda 1 500 teńgege deiin baǵalanatyn jáne turaqty suranysqa ie bolǵan 300-den astam dári bar edi. Demek, olardyń joǵalýy suranys az bolǵandyqtan emes, ol basqa sebepterge bailanysty", – dedi Dýrmanova.
Onyń aitýynsha, bul tendentsiia biyl da saqtalyp otyr: quny 1 000 teńgege deiingi preparattar azaiyp, olardyń ornyna qymbat dáriler paida bolǵan.
Arzan dárilerdiń naryqtan azaiýyn toqtatý úshin Densaýlyq saqtaý ministrligi 2026 jylǵy 10 qańtardan bastap quny 1 AEK-ten (3 932 teńge) tómen dárilerdiń baǵasyn retteýden bosatýdy josparlap otyr.
"Bul qadamnyń maqsaty – qoljetimdi, biraq áleýmettik mańyzy bar preparattardyń naryqta saqtalýyn qamtamasyz etý", – dep túsindirdi Marina Dýrmanova.
