قازاقستاندا قولجەتىمدى باعامەن ساتىلاتىن دارى-دارمەكتەردىڭ ءتۇر-تۇرى ازايىپ بارادى. فارماسيەۆتيكالىق قىزمەتتى قولداۋ جانە دامىتۋ قاۋىمداستىعىنىڭ دەرەگىنشە، سوڭعى ەكى جىلدا ەلىمىزدە تىركەلگەن پرەپاراتتاردىڭ تورتتەن ءبىرى نارىقتان جوعالىپ، ال ارزان دارىلەردىڭ ۇلەسى ۇشتەن بىرىنە قىسقارعان. دەنساۋلىق ساقتاۋ مينيسترلىگى بۇل ءۇردىستى توقتاتۋ ءۇشىن ارنايى شارالار ازىرلەۋدە، دەپ حابارلايدى Dalanews.kz.

Zakon.kz مالىمەتىنشە، قاۋىمداستىق پرەزيدەنتى مارينا دۋرمانوۆا مەديسينالىق تۋريزمگە ارنالعان فورۋمدا سالاداعى جاعدايعا تالداۋ ۇسىنعان. ونىڭ ايتۋىنشا، ءدارىحانالارداعى پرەپاراتتاردىڭ ناقتى سانى 25،5%-عا تومەندەگەن – 2023 جىلى 7 932 بولسا، ءقازىر 5 907ء-سى عانا قالعان.

"باعاسى 1 000 تەڭگەگە دەيىنگى دارىلەردىڭ سانى 34،5%-عا قىسقاردى. بۇل كەيبىر ارزان دارىلەردىڭ مۇلدە نارىقتان كەتكەنىن بىلدىرەدى. ولاردىڭ ورنىن ءقازىر قىمبات دجەنەريكتەر باستى. اراسىندا 1 500 تەڭگەگە دەيىن باعالاناتىن جانە تۇراقتى سۇرانىسقا يە بولعان 300-دەن استام ءدارى بار ەدى. دەمەك، ولاردىڭ جوعالۋى سۇرانىس از بولعاندىقتان ەمەس، ول باسقا سەبەپتەرگە بايلانىستى"، – دەدى دۋرمانوۆا.

ونىڭ ايتۋىنشا، بۇل تەندەنسيا بيىل دا ساقتالىپ وتىر: قۇنى 1 000 تەڭگەگە دەيىنگى پرەپاراتتار ازايىپ، ولاردىڭ ورنىنا قىمبات دارىلەر پايدا بولعان.

ارزان دارىلەردىڭ نارىقتان ازايۋىن توقتاتۋ ءۇشىن دەنساۋلىق ساقتاۋ مينيسترلىگى 2026 جىلعى 10 قاڭتاردان باستاپ قۇنى 1 اەك-تەن (3 932 تەڭگە) تومەن دارىلەردىڭ باعاسىن رەتتەۋدەن بوساتۋدى جوسپارلاپ وتىر.

"بۇل قادامنىڭ ماقساتى – قولجەتىمدى، ءبىراق الەۋمەتتىك ماڭىزى بار پرەپاراتتاردىڭ نارىقتا ساقتالۋىن قامتاماسىز ەتۋ"، – دەپ ءتۇسىندىردى مارينا دۋرمانوۆا.