14 qazan kúni Almaty qalasynda Qańtar oqiǵasyna qatysty is boiynsha apelliatsiialyq shaǵymdardy qaraý bastaldy. Buǵan deiin osy is boiynsha atyshýly «Dikii Arman» laqap atymen tanymal Arman Jumageldiev 20 jylǵa bas bostandyǵynan aiyrylǵan edi, dep habarlaidy Dalanews.kz.
Eske salaiyq, 2025 jyldyń 7 qańtarynda sot Qańtar oqiǵasyna qatysy bar 44 aiyptalýshyǵa úkim shyǵarǵan bolatyn. Olardyń arasynda Arman Jumageldiev, Almaty qalalyq máslihatynyń burynǵy depýtaty Qairat Qudaibergen jáne UQK-niń 5-departamentiniń eks-basshysy Rýslan Ysqaqov bar.
Sot úkimine sáikes, Arman Jumageldiev uiymdasqan qylmystyq top qurǵany, jappai tártipsizdikke qatysqany jáne 24 adamdy zańsyz bostandyǵynan aiyrǵany úshin kináli dep tanylyp, 20 jylǵa sottaldy. Qairat Qudaibergenge – 8 jyl, al Rýslan Iskakovqa – 15 jyl 6 ai túrme jazasy jáne memlekettik qyzmette jumys isteýge ómir boiyna tyiym salyndy.
Sonymen qatar «Dikii Armannyń» tobyna qatysy bar dep tanylǵan 13 adam 10 jyldan 15 jyl 6 aiǵa deiin sottaldy. Al toppen bailanysy dáleldenbegen ózge aiyptalýshylarǵa 1,5 jyldan 7 jylǵa deiingi jaza taǵaiyndaldy. Olardyń keibiri tergeý izoliatorynda jáne úi qamaýynda ótkizgen ýaqytyn esepke ala otyryp, sot zalynan bosatylǵan.
Almaty qalalyq sotynyń baspasóz qyzmeti Tengrinews.kz-ke bergen málimetinde, 14 qazanda sottalǵandardyń apelliatsiialyq shaǵymdaryn qaraý bastalǵanyn habarlady. Tyńdaýlar jabyq túrde ótip jatyr oǵan BAQ ókilderi men tyńdaýshylar kirgizilmeidi.
