Astanada kóshe qylmystary jii tirkeletin aýmaqtardy aldyn ala anyqtap, sol jerlerde profilaktikalyq jumysty kúsheitýge múmkindik beretin «Kóshedegi qylmysty boljaýdyń JI-modeli» pilottyq jobasy iske qosyldy. Bul týraly prokýratýra málimdedi,- dep habarlaidy Dalanews.kz
Memleket basshysynyń biyl 23 maýsymda ótken quqyq qorǵaý organdary alqasynyń keńeitilgen otyrysynda aitqan tapsyrmasyn oryndaý maqsatynda – qylmystyq qaterlerdi boljaý jáne olarǵa qarsy is-qimyl júiesin qaita iske qosý úshin Quqyqtyq statistika jáne arnaiy esepke alý komitetiniń áleýetin paidalana otyryp, qoǵamdyq qaýipsizdik salasyndaǵy qaterlerdi aldyn ala anyqtap, eskertýge baǵyttalǵan boljamdy-taldamalyq ortalyqqa vedomstvony transformatsiialaý jónindegi keshendi sharalar ázirlendi.
Jobanyń basty maqsaty – qylmystyq qaterlerdi aldyn ala boljaityn jáne eskertýge múmkindik beretin zamanaýi júie qalyptastyrý.
Osy maqsatta Bas prokýrordyń tapsyrmasymen vedomstvo janynan Qoǵamdyq qaýipsizdik qaterleri men qylmystyq qaýipterdi boljaý ortalyǵy pilottyq rejimde quryldy.
Atalǵan ortalyqtyń alǵashqy qadamdarynyń biri – 9 shildede Astanada «Kóshedegi qylmysty boljaýdyń JI-modeli» pilottyq jobasynyń iske qosylýy.
Joba Ishki ister ministrligimen birlesip júzege asyrylyp jatyr jáne onyń maqsaty – kóshe qylmystary jii bolatyn oryndardy aldyn ala anyqtap, sol aýmaqtarda ýákiletti organdar, sonyń ishinde politsiia tarapynan profilaktikalyq sharalardy kúsheitý.
Júie jańa tehnologiialar men úlken derekter bazasyna negizdelgen. Ol qylmystar týraly aqparatty qashan jáne qaida quqyqbuzýshylyq bolǵanyn taldaidy.
Sońǵy 10 jylda elordada tirkelgen qylmystyq oqiǵalar boiynsha jinaqtalǵan tarihi málimetter negizinde jasandy intellekt elementteriniń kómegimen belgili bir radiýsta belgili bir qylmystyń bolý yqtimaldyǵy boljanady. Bul problemalyq aýdandardy anyqtap, aldyn alý sharalaryn qabyldaýǵa múmkindik beredi.
Atalǵan málimetterdiń arqasynda politsiia patrýldeý baǵyttaryn tiimdi josparlap, yqtimal quqyqbuzýshylyqtarǵa jedel áreket ete alady, al jergilikti atqarýshy organdar – qalalyq infraqurylymdy qaýipsiz etý boiynsha (beinebaqylaý kameralaryn ornatý, jaryqtandyrý jáne t.b.) sharalar qabyldai alady.
Joba aiasynda pilottyq kezeń sátti júzege asyrylsa, bul tájiribe elimizdiń basqa da iri qalalyq aglomeratsiialaryna engiziledi.
