Soltústik Qazaqstan oblysy energetika men kommýnaldyq sharýashylyqty jańǵyrtýdy jedeldetip, jelilerdiń senimdiligi men árbir aýyldyń taza sýǵa qoljetimdiligine basymdyq berip otyr. Bul týraly Ortalyq kommýnikatsiialar qyzmetindegi brifingte SQO ákimi Ǵaýez Nurmuhambetov málimdedi, dep habarlaidy Dalanews.kz
Memleket basshysy Joldaýynda kommýnaldyq infraqurylymdy aýqymdy jańǵyrtýdyń qajettiligin atap ótken bolatyn, al óńir naqty nátijeler kórsetýde. Taiynsha qalasynda 730 mln teńgege 4,5 km jylý jelilerin jańǵyrtý jumystary aiaqtalýda. Biyl oblysta 76 km elektrjelileri aýystyrylyp, jalpy somasy 13 mlrd teńgege 3 qosalqy stansa qaita jańartyldy. Petropavl qalasy úshin uzyndyǵy 8,1 km bolatyn eki jylý jelisi jobasy ázirlenýde, olardyń jalpy quny – 11 mlrd teńge. Jalpy alǵanda, 2029 jylǵa deiin 7 myń km-den astam injenerlik jeliler jańǵyrtylady.
2025–2026 jyldardyń jylytý maýsymyna daiyndyq aiasynda aýqymdy jumystar júrgizildi: 1,5 myń km elektr jelisi, 13 km jylý jáne 5 km sý qubyry jelisi jóndeldi, Petropavl jylý elektr ortalyǵy-2-niń №1 murjasy salynyp bitti. Bul óńir elektr júiesiniń senimdiligin arttyrdy.
Ákim erekshe atap ótken baǵyt – aýyldy sýmen qamtamasyz etý. Úkimettiń qoldaýynyń arqasynda aýyldyq eldi mekenderdiń 100%-y sapaly sýmen qamtyldy. Biyl sýmen jabdyqtaýdy damytýǵa rekordtyq 74 mlrd teńge bólindi, bul kórsetkish sońǵy úsh jyldaǵydan eki ese joǵary. Onyń ishinde 44,9 mlrd teńge – qaitarylǵan aktivterden túsken qarajat. Jumystar aiaqtalýǵa jaqyn, iske qosý-retteý sharalary júrip jatyr, eń bastysy – sý aýyldarǵa jetti.
