Almatyda 2023 jyldyń qarashasynda hostelde bolǵan órt saldarynan 13 adam qaza tapqan oqiǵaǵa qatysty sot úkimi shyqty, dep habarlaidy Dalanews.kz.
Sot aldynda hostel direktory Ádilbek Muhamediiarov pen bul ǵimaratqa órt qaýipsizdigi júiesin ornatqan "Gidservis" merdiger uiymynyń ókili Aleksandr Pekelnik jaýap berdi. Memlekettik aiyptaýshy Muhamediiarovqa 5 jyl, al Pekelnikke 4 jyl bas bostandyǵynan aiyrý jazasyn suraǵan.
Sot Muhamediiarovty – órt qaýipsizdigi talaptaryn buzdy, al Pekelnikti – qaýipsizdik talaptaryna sai emes jumys atqardy dep tanydy.
Nátijesinde Muhamediiarovqa – koloniia-qonysta 5 jyl, al Pekelnikke – sondai mekemede 4 jyl bas bostandyǵynan aiyrý jazasy taǵaiyndaldy. Zardap shekken taraptardyń azamattyq talaptary ishinara qanaǵattandyryldy.
2023 jylǵy 30 qarasha kúni tańerteń Almatydaǵy Ádi Sháripov kóshesinde ornalasqan hostelde órt shyqqan. Órt kezinde ǵimaratta 72 adam bolǵan. Olardyń 59-y óz betimen syrtqa shyqsa, 13 adam qaza tapty. Taǵy úsheýi aýrýhanaǵa jetkizilgen. Birneshe kúnnen keiin bul ǵimaratty jalǵa alǵan tulǵa ustaldy.
Qujat boiynsha jer telimi dúkendi paidalaný jáne kútip ustaý maqsatynda bólingeni belgili boldy. Tergeý 2024 jyldyń qarashasynda aiaqtalǵan.
