Aqtóbede shetelden kelgen investorlar, qazaqstandyq iri biznes ókilderi jáne ortalyq memlekettik organdardyń basyn qosqan «AQTOBE INVESTMENT FORUM – 2025» halyqaralyq investitsiialyq forýmy ótti, dep habarlaidy Dalanews.kz
Sharanyń halyqaralyq deńgeiin aiqyndaǵan basty erekshelik - forýmǵa 20 memleketten ókilder jáne 7 elshi qatysty.
Aqtóbe oblysynyń ákimi Ashat Shaharov barlyq qatysýshylardy, qonaqtardy jáne sheteldik delegatsiia ókilderin quttyqtap, forým tájiribe almasý, syndarly dialog júrgizý jáne jańa birlesken jobalardy júzege asyrý úshin mańyzdy alańǵa ainalatynyna senim bildirdi.
«Biz árqashan uzaqmerzimdi jáne ózara tiimdi yntymaqtastyqqa ashyqpyz. Bizdiń aimaqqa investitsiia salýdy oilastyratyn kez kelgen investor óz bastamalarynyń ár kezeńinde qoldaý men jan-jaqty kómek kórsetetinine senimdi bola alady. Aqtóbe oblysy elimizdiń ózge óńirleri arasynda eń úlken aýmaqqa, bai tabiǵi resýrstarǵa, bilikti kadrlarǵa jáne qolaily geografiialyq ornalasýyna ie. Oblystaǵy 19 myńnan astam jumys istep turǵan kásiporyn, arnaiy ekonomikalyq aimaq, agroónerkásiptik keshendegi jobalar óńirdi investitsiia úshin erekshe tartymdy etedi», - dep atap ótti Ashat Shaharov.
Oblys ákimi jyl basynan beri óńir ekonomikasyna 892 milliard teńge tartylyp, byltyrǵy jylmen salystyrǵanda 129 paiyzǵa artqanyn atap ótti. 2025 jyly jalpy quny 110 milliard teńgeden asatyn segiz joba júzege asyryldy, onyń ishinde jańartylatyn energiia kózderiniń iri nysany iske qosyldy.
Oblys ákiminiń quttyqtaý sózinen keiin forýmnyń iskerlik baǵdarlamasy turaqty ósim, ónerkásiptik áriptestik, aýyl sharýashylyǵyn damytý, tsifrlandyrý máselelerine arnalǵan plenarlyq otyrys pen taqyryptyq sessiialarmen jalǵasty.
Forým 40-tan astam sheteldik kompaniiany, sonyń ishinde halyqaralyq uiymdardy, tehnologiialyq habtardy jáne ónerkásiptik korporatsiialardy biriktirdi. 25 kompaniianyń ókilderi bar Qytaidan kelgen investorlar erekshe qyzyǵýshylyq tanytty.
Olar naqty óndiris salasyndaǵy jobalarǵa, ǵylymdy qajet etetin ázirlemelerge, jańa tehnologiialardy engizý bastamalaryna kóp kóńil bóldi. Qatysýshy kompaniialardy innovatsiialyq jáne áleýmettik mańyzdy jobalar, atap aitsaq, joǵary tehnologiialyq ortalyqtar, ónerkásiptik habtar, qarjy institýttary, óńdeýshi kásiporyndar men eksporttyq áleýeti bar agroónerkásiptik keshendegi yntymaqtastyq perspektivalary qyzyqtyrdy jáne halyqaralyq sarapshylardyń pikirinshe, aqtóbelik óndirýshilerdiń ónimderi aitarlyqtai sapaly, áleýeti joǵary. Oblys ákimi Ashat Shaharovtyń aitýynsha, óńirde máselelerdi tez ári artyq biýrokratiiasyz sheshýge múmkindik beretin qolaily investitsiialyq ahýal jasalǵan.
Óndiristik kompaniialar forýmǵa belsendi túrde qatysyp, jańa óndiristik sheshimder men salany jańǵyrtý tásilderin usynyp otyr. Olardyń qatarynda mashina jasaý, metallýrgiia, tsifrlyq óndiris jáne meditsinalyq infraqurylym salalaryndaǵy jobalar bar.
Forým qorytyndysy boiynsha 448 mlrd teńgeni quraityn 17 memorandým men kelisimge qol qoiyldy. Negizgi jobalarǵa mynalar jatady: Hromtaý aýdanynda 100 MVt jel elektr stantsiiasynyń qurylysy (SUNGROW, Qytai); STG zaýytynyń jobasy (Condor Energies, Kanada); jáne Aqtóbe oblysynda sýsyndar shyǵaratyn zaýyttyń qurylysy (Coca-Cola Almaty Bottlers, Túrkiia), metall buiymdaryn shyǵaratyn metallýrgiialyq zaýyt (Soiýz Metallservis, Qytai); agroónerkásiptik klasterdi qurý (Harvest Agro Holding, Shveitsariia); Aqtóbe qalasynda 180 MVt gazben jumys isteitin elektr stantsiiasynyń qurylysy (MUREL, Túrkiia).
«Aqtóbe» AEA basqarýshy kompaniiasy «Gantsiýanbao» ekonomikalyq aimaǵymen (Úrimshi, Qytai) yntymaqtastyq týraly kelisimge qol qoidy.
Shara qonaqtaryna óńirdiń investitsiialyq áleýeti kórsetilip, óńirlik taýar óndirýshilerdiń kórmesi jáne Aqtóbe oblysynyń nysandaryna óndiristik ekskýrsiia uiymdastyryldy.
