Senat depýtaty Nurtóre Júsip «Diplommen - aýylǵa» memlekettik baǵdarlamasyna qatysatyn mamandardyń bári birdei belgilengen talaptardy oryndamaitynyn aitty, dep habarlaidy Dalanews.kz.
Onyń sózinshe, keibir jas mamandar aýyldyq jerde úsh jyl jumys isteý jónindegi mindettemelerin buzǵan.
Sońǵy úsh jylda 166 maman kelisim talaptaryn oryndamai, aýyldyq jerde belgilengen merzimdi jumys istemegen. Buǵan qosa, olardyń ótelmegen jeńildetilgen nesieleri 784 mln teńgeden asyp otyr.
Senatordyń aitýynsha, áleýmettik qoldaý sharalary – kótermeaqy men jeńildetilgen nesie – aýylǵa kadr tartýǵa yqpal etedi. Alaida olardy uzaq merzimge ustap qalý úshin jetkiliksiz. Jalaqy deńgeii, turǵyn úidiń qoljetimdiligi, áleýmettik infraqurylymnyń álsizdigi, biýrokratiialyq kedergiler jáne óńirlerdegi tájiribeniń árkelkiligi – basty problemalar qatarynda.
Nurtóre Júsip anyqtalǵan máselelerdi eskere otyryp, baǵdarlamany qaita qaraýdy jáne oǵan ózgerister engizýdi usyndy.
