Qazaqstandyq astyq óndirýshiler men eksporttaýshylar shekaradaǵy logistikalyq shekteýlerge bailanysty taǵy da qiyndyqtarǵa tap boldy. «Qazaqstan temir joly» ulttyq tasymaldaýshysy Saryaǵash memleketaralyq beketi arqyly júk qabyldaýǵa konventsiialyq tyiym saldy. Bul ótkizý pýnkti – Qazaqstannan Ózbekstan, Qyrǵyzstan, Tájikstan, Túrikmenstan jáne Aýǵanstan baǵytyndaǵy astyq eksportynyń negizgi baǵyty, dep habarlaidy Dalanews.kz.
Shekteýler tek qazaqstandyq eksporttaýshylarǵa qatysty qoldanylyp otyr. Al Reseiden nemese Ózbekstannan tranzit arqyly ótetin júkterge bul tyiym áser etpeidi. Bul – osyndai jaǵdaidyń alǵash ret qaitalanyp otyrǵany emes.
Sala ókilderiniń aitýynsha, mundai tyiymdar birneshe teris áserge ákelýde:
- sheteldik jetkizýshiler Qazaqstannyń dástúrli naryqtaryn basyp alýda;
- otandyq óndirýshiler vagondardyń qaraýsyz turyp qalýyna bailanysty aiyppul tólep, óz satyp alýshylaryn joǵaltady;
- biýdjet josparlanǵan salyq túsimin ala almai otyr.
Sarapshshylardyń sózinshe, astyq eksportyndaǵy jaǵdai Qazaqstannyń jalpy eksporttyq logistikasynyń qanshalyqty osal ekenin kórsetetin indikatorǵa ainaldy.
"Eger búgin ulttyq kompaniia astyqqa konventsiialyq tyiym salsa, erteń dál osyndai shekteýlerge munai ónimderi nemese basqa strategiialyq júkter tap bolmaitynyna qandai kepil bar? Temirjol infraqurylymyna táýeldilik ásirese janar-jaǵarmai ónimderi úshin joǵary. Bul táýeldilik kez kelgen ýaqytta otandyq óndirýshilerdiń naryqtaǵy pozitsiiasyn álsiretýi múmkin", - deidi sarapshylar.
