Qazaqstanda 2026 jyldyń qańtar–tamyz ailarynda munai óndirý kólemi ótken jyldyń sáikes kezeńimen salystyrǵanda 8,4%-ǵa azaidy, dep habarlaidy dalanews.kz.
Úkimet jariialaǵan óndiristik kórsetkishterge sáikes, segiz aida elde 61,7 million tonna munai óndirilgen. Naqty kólem indeksi (NKI) 91,6%-dy qurady.
Sonymen qatar tamyz aiynda óndiris qarqyny birshama jandanǵany baiqalady. Qańtar–shilde aralyǵynda óndirilgen munai kólemi 53,2 million tonnany qurasa, naqty kólem indeksi 91,1% bolǵan. Bul saladaǵy jaǵdaidyń birtindep qalpyna kele bastaǵanyn kórsetedi.
Osyǵan bailanysty Úkimet 2026 jylǵa arnalǵan munai óndirý boljamyn qaita qarady. Buǵan deiin josparlanǵan 100,5 million tonna kórsetkish aldymen 98 million tonnaǵa deiin tómendetilse, qazir jyldyq jospar 96 million tonna bolyp bekitildi.
Boljamnyń qysqarýyna birneshe faktor áser etken. Atap aitqanda, jyl basynda Teńiz ken ornyndaǵy transformatorlardyń isten shyǵýy óndiris kólemine keri yqpal etti. Sondai-aq Kaspii qubyr konsortsiýmy (KQK) infraqurylymyna jasalǵan ushqyshsyz ushý apparattarynyń shabýyldary da munai tasymaly men óndirý kórsetkishterine áserin tigizgen.
