Prezident Koreia Respýblikasynyń premer-ministrimen kezdesti, dep habarlaidy dalanews.kz.
Qasym-Jomart Toqaev Han Son Sýkty Koreia Úkimetiniń basshysy bolyp taǵaiyndalýymen quttyqtap, asa jaýapty qyzmetine tabys tiledi.
"Búginde qazaq-korei qarym-qatynastary turaqty túrde jaqsy damyp kele jatyr. Strategiialyq áriptestigimizdiń aiasynda qos tarap úshin de paidaly bolatyn kóptegen mańyzdy bastamalar júzege asyrylýda. Sizdiń elińiz Qazaqstannyń on iri saýda jáne investitsiialyq seriktesiniń qataryna kiredi. Qazaqstanda korei kapitaly bar 1 myńnan astam birlesken kásiporyn jumys isteidi. Biraq aldymyzda turǵan jaýapty mindet óte kóp. Sizdermen birge josparlarymyzdy oidaǵydai iske asyramyz dep oilaimyn", – dedi Qazaqstan Prezidenti.
Memleket basshysy Qazaqstanda ońtaily iskerlik jáne investitsiialyq klimat jolǵa qoiylǵanyn atap ótti.
"Elimizde Koreianyń iri korporatsiialarymen qatar, shaǵyn jáne orta biznes ókilderiniń kásippen ainalysýyna qolaily jaǵdai jasalǵan. Osy baǵytta qazaq-korei úkimetteri qajetti sharalardy atqaryp jatyr. Atap aitqanda, Saýda-ekonomikalyq jáne ǵylymi-tehnikalyq yntymaqtastyq jónindegi úkimetaralyq komissiia, sondai-aq Iskerlik keńes tiimdi jumys istep keledi. Sonymen qatar qajetti quqyqtyq negiz qalyptasqan", – dedi Qasym-Jomart Toqaev.
Premer-ministr Han Son Sýk Koreia Respýblikasy ózara bailanystardy odan ári tereńdetýge múddeli ekenin aitty.
"Prezident myrza, Sizben júzdesý – men úshin zor mártebe. Ózińiz atap ótkendei, Qazaqstan Koreia Respýblikasynyń Ortalyq Aziiadaǵy iri saýda jáne investitsiialyq seriktesi sanalady. Osy sammit aiasynda eki el arasyndaǵy yntymaqtastyq, ásirese, ekonomika, energetikalyq tasymal tizbegi baǵyttarynda jandana túsedi dep úmittenemin. Sondai-aq Koreia Alataý qalasyn damytýda Qazaqstannyń áleýetti seriktesteriniń biri bolady dep oilaimyn", – dedi Koreia Respýblikasynyń Úkimet basshysy.
Premer-ministrdiń aitýynsha, ekijaqty qarym-qatynasqa ekonomikalyq bastamalar ǵana emes, sonymen qatar, qarqyn alǵan mádeni-gýmanitarlyq bailanystar jáne azamattardyń barys-kelisiniń kóbeiýi de erekshe serpin berip otyr.
Kezdesý barysynda kólik-logistika, asa mańyzdy materialdar, mashina jasaý, tsifrlandyrý jáne jasandy intellekt pen meditsinany damytý salalaryndaǵy birlesken jobalardy iske asyrý jospary talqylandy.
