Premer-ministr Oljas Bektenov Prezident Qasym-Jomart Toqaevtyń «Taza Qazaqstan» bastamasyn iske asyrý boiynsha keńes ótkizip, óńirlerge zańsyz qoqys alańdaryn biyl tolyq joiýdy tapsyrdy, dep habarlaidy Dalanews.kz.
Keńeste Ekologiia jáne tabiǵi resýrstar ministri Erlan Nysanbaev tabiǵatty qorǵaý sharalary, aǵash otyrǵyzý, zańsyz qoqys poligondaryn joiý jáne qaldyqtardy óńdeý jobalary týraly baiandama jasady. Sonymen qatar vitse-premer Aida Balaeva, ǵylym jáne joǵary bilim ministri Saiasat Nurbek, oqý-aǵartý ministri Juldyz Súleimenova halyq arasynda ekologiialyq mádenietti nyǵaitý baǵytyndaǵy jumystardy tanystyrdy.
Premer-ministrdiń aitýynsha, «Taza Qazaqstan» bastamasy – jai ǵana qoqys jinaý aktsiiasy emes, jańa ekologiialyq mádeniet qalyptastyratyn jalpyulttyq qozǵalys.
«Tabiǵatty qorǵaý ideiasyna búkil qoǵamdy jumyldyrý, ár azamattyń qorshaǵan ortany taza ustaýǵa atsalysýy – bizdiń basty nátijemiz bolýy tiis», – dedi Bektenov.
Ministrliktiń málimetinshe, biyl «Taza Qazaqstan» aiasynda respýblika boiynsha 1 250 ekologiialyq is-shara ótkizilip, 2,8 mln-nan astam aǵash otyrǵyzylǵan. Qalalar men aýyldardaǵy tazalyq jumystaryn qosqanda 3,8 mln aǵash egilgen. Búginde el boiynsha 18 mln-nan astam kóshet otyrǵyzylyp, Prezidenttiń 2025 jylǵa deiingi jospary merziminen buryn oryndaldy.
Zańsyz qoqys oryndaryn joiý boiynsha da jumystar kúsheigen. Ǵaryshtyq monitoring nátijesinde anyqtalǵan 3 833 qoqys alańynyń 80%-y joiyldy. Osy baǵytta 165 laýazymdy tulǵa ákimshilik jaýapkershilikke tartylyp, 12,4 mln teńge aiyppul salynǵan.
«TazaQazBot» platformasyna jyl basynan beri 24 myńnan astam ótinish túsken, onyń 23 myńnan astamy oryndaldy. Halyq negizinen aýmaqtardy tazartý, qoqys shyǵarý, abattandyrý jáne jol jóndeý máselelerin kótergen.
Sonymen birge elimizde qaldyqtardy basqarý infraqurylymyn keńeitý jumystary júrgizilýde. 8 jańa QTQ poligony paidalanýǵa berilip, quny 89,4 mlrd teńgeni quraityn 22 joba iske asyrylýda. Astana, Almaty jáne Shymkentte qoqys órteý zaýyttaryn salý boiynsha da kelisimder jasaldy.
Keńes qorytyndysynda Premer-ministr Oljas Bektenov ákimdikterge jyl sońyna deiin anyqtalǵan barlyq zańsyz qoqys alańdaryn tolyǵymen joiýdy qatań tapsyrdy.
