Búgin oblys ákimi Berik Ýáli jańa «Smart City» yqshamaýdanyna baryp, stadionnyń qurylys barysymen tanysty, dep habarlaidy Dalanews.kz
«Týǵan jerge týyńdy tik» investitsiialyq forýmy aiasynda Semei qalasy ákimdigi men «KAZ Minerals» JShS arasynda memorandým jasalyp, 25 myń kórermenge arnalǵan stadion salý josparlanǵan. Jer teliminiń jalpy aýmaǵy – 20 gektar. Qazirgi ýaqytta 25 myń oryndyq stadionnyń qurylysyn júrgizetin merdiger uiymmen úsh jaqty kelisimshart jasalyp, aýmaq qorshalyp, jerdi qazý, tegisteý jumystary bastaldy.
Jobaǵa sáikes aýmaqta asfaltbetondy joldar men alańdar qarastyrylǵan. Arhitektýralyq-josparlaý jáne injenerlik-qurylymdyq sheshimderdi ázirleý barysynda aimaqtyń tabiǵi-klimattyq jáne geologiialyq erekshelikteri tolyq eskerildi. Stadion qurylysy 2 jyldan keiin aiaqtalatyn bolady.
«Búgin, mine, stadionnyń qurylys jumystary bastaldy. Osy jumysty báseńdetpei, jalǵastyrý qajet. Qarjysy kezeń-kezeńimen bólinetin bolady. Bul – semeilikterdiń kópten kútken jańalyǵy. Semei – qazaq fýtbolynyń otany. Qala turǵyndary fýtboldy jaqsy kóredi. Sol sebepti osyndai stadion kerek. Kópten beri aitylyp júr. Nysan ázirge Astana, Almaty, Aqtóbeden keiingi syiymdylyǵy jaǵynan qurylysy josparlanǵan stadiondardyń arasynda 4-shi oryndy alady. ÝEFA-nyń matchtaryn qabyldaýǵa múmkindik týady, olardyń standarttaryna sai keledi. Bul jańa yqsham aýdanda áli de qanshama nysandardyń qurylysy bastalady. Jaqyn arada mańǵystaýlyqtar alǵash bolyp qorshaý qoiyp, jumystaryn bastaiyn dep otyr. Eń bastysy, Úkimet tarapynan kelisim bar. Qujattar rásimdelgennen keiin jumystar bastalady», - dedi aimaq basshysy.
Memleket basshysy Qasym-Jomart Toqaevtyń qoldaýymen bastalǵan «Abaiǵa qurmet» aktsiiasy aiasynda elimizdiń birneshe óńiri Semei qalasyna bir nysannan salyp berýge óz usynystaryn berdi. Mańǵystaý oblysy Dostyq úiiniń irgetasyn qalady. Shymkent qalasy shyǵarmashylyq ortalyǵy men Mádeniet úiin, Túrkistan oblysy kórme ortalyǵyn, Astana qalasy Keleshek mektebin, Aqtóbe oblysy jekpe jek ortalyǵyn, Pavlodar oblysy ústel tennisi ortalyǵyn, Soltústik Qazaqstan oblysy rámizder alańyn, Qyzylorda oblysy «Anaǵa taǵzym» ortalyǵyn, Batys Qazaqstan oblysy jelilik saiabaq salýdy, Shyǵys Qazaqstan oblysy Ertis jaǵalaýyn abattandyrýdy josparlap otyr.
