بۇگىن وبلىس اكىمى بەرىك ءۋالي جاڭا «Smart City» ىقشاماۋدانىنا بارىپ، ستاديوننىڭ قۇرىلىس بارىسىمەن تانىستى، دەپ حابارلايدى Dalanews.kz
«تۋعان جەرگە تۋىڭدى تىك» ينۆەستيسيالىق فورۋمى اياسىندا سەمەي قالاسى اكىمدىگى مەن «KAZ Minerals» ج ش س اراسىندا مەموراندۋم جاسالىپ، 25 مىڭ كورەرمەنگە ارنالعان ستاديون سالۋ جوسپارلانعان. جەر تەلىمىنىڭ جالپى اۋماعى – 20 گەكتار. قازىرگى ۋاقىتتا 25 مىڭ ورىندىق ستاديوننىڭ قۇرىلىسىن جۇرگىزەتىن مەردىگەر ۇيىممەن ءۇش جاقتى كەلىسىمشارت جاسالىپ، اۋماق قورشالىپ، جەردى قازۋ، تەگىستەۋ جۇمىستارى باستالدى.
جوباعا سايكەس اۋماقتا اسفالتبەتوندى جولدار مەن الاڭدار قاراستىرىلعان. ارحيتەكتۋرالىق-جوسپارلاۋ جانە ينجەنەرلىك-قۇرىلىمدىق شەشىمدەردى ازىرلەۋ بارىسىندا ايماقتىڭ تابيعي-كليماتتىق جانە گەولوگيالىق ەرەكشەلىكتەرى تولىق ەسكەرىلدى. ستاديون قۇرىلىسى 2 جىلدان كەيىن اياقتالاتىن بولادى.
«بۇگىن، مىنە، ستاديوننىڭ قۇرىلىس جۇمىستارى باستالدى. وسى جۇمىستى باسەڭدەتپەي، جالعاستىرۋ قاجەت. قارجىسى كەزەڭ-كەزەڭىمەن بولىنەتىن بولادى. بۇل – سەمەيلىكتەردىڭ كوپتەن كۇتكەن جاڭالىعى. سەمەي – قازاق فۋتبولىنىڭ وتانى. قالا تۇرعىندارى فۋتبولدى جاقسى كورەدى. سول سەبەپتى وسىنداي ستاديون كەرەك. كوپتەن بەرى ايتىلىپ ءجۇر. نىسان ازىرگە استانا، الماتى، اقتوبەدەن كەيىنگى سىيىمدىلىعى جاعىنان قۇرىلىسى جوسپارلانعان ستاديونداردىڭ اراسىندا 4ء-شى ورىندى الادى. ۋەفا-نىڭ ماچتارىن قابىلداۋعا مۇمكىندىك تۋادى، ولاردىڭ ستاندارتتارىنا ساي كەلەدى. بۇل جاڭا ىقشام اۋداندا ءالى دە قانشاما نىسانداردىڭ قۇرىلىسى باستالادى. جاقىن ارادا ماڭعىستاۋلىقتار العاش بولىپ قورشاۋ قويىپ، جۇمىستارىن باستايىن دەپ وتىر. ەڭ باستىسى، ۇكىمەت تاراپىنان كەلىسىم بار. قۇجاتتار راسىمدەلگەننەن كەيىن جۇمىستار باستالادى»، - دەدى ايماق باسشىسى.
مەملەكەت باسشىسى قاسىم-جومارت توقايەۆتىڭ قولداۋىمەن باستالعان «ابايعا قۇرمەت» اكسياسى اياسىندا ەلىمىزدىڭ بىرنەشە ءوڭىرى سەمەي قالاسىنا ءبىر نىساننان سالىپ بەرۋگە ءوز ۇسىنىستارىن بەردى. ماڭعىستاۋ وبلىسى دوستىق ءۇيىنىڭ ىرگەتاسىن قالادى. شىمكەنت قالاسى شىعارماشىلىق ورتالىعى مەن مادەنيەت ءۇيىن، تۇركىستان وبلىسى كورمە ورتالىعىن، استانا قالاسى كەلەشەك مەكتەبىن، اقتوبە وبلىسى جەكپە جەك ورتالىعىن، پاۆلودار وبلىسى ۇستەل تەننيسى ورتالىعىن، سولتۇستىك قازاقستان وبلىسى رامىزدەر الاڭىن، قىزىلوردا وبلىسى «اناعا تاعزىم» ورتالىعىن، باتىس قازاقستان وبلىسى جەلىلىك ساياباق سالۋدى، شىعىس قازاقستان وبلىسى ەرتىس جاعالاۋىن اباتتاندىرۋدى جوسپارلاپ وتىر.
