Memleket basshysy «Qazaqstan Respýblikasynyń keibir zańnamalyq aktilerine mádeniet, bilim berý, otbasy jáne memlekettik baqylaý máseleleri boiynsha ózgerister men tolyqtyrýlar engizý týraly» Zańǵa qol qoidy, dep habarlaidy Dalanews.kz.
Atalǵan Zań arqyly Jer, Biýdjet, Kásipkerlik, «Neke (erli-zaiyptylyq) jáne otbasy týraly», «Halyq densaýlyǵy jáne densaýlyq saqtaý júiesi týraly» kodeksterge, sondai-aq «Qazaqstan Respýblikasyndaǵy til týraly», «Qazaqstan Respýblikasyndaǵy bala quqyqtary týraly», «Mádeniet týraly», «Bilim týraly» jáne «Pedagog mártebesi týraly» zańdarǵa ózgerister engizildi.
Túzetýlerdiń birinshi blogy jetim jáne ata-ana qamqorlyǵynsyz qalǵan balalardy qorǵaýdyń quqyqtyq tetikterin kúsheitedi.
Balany asyrap alý jáne kámeletke tolmaǵandarǵa qamqorshylyqty nemese qorǵanshylyqty taǵaiyndaý barysynda balanyń týystaryna, al olar bolmaǵan jaǵdaida nekede turǵan adamdarǵa basym quqyq beriledi.
Túzetýlerdiń ekinshi blogyna sáikes, balalardyń tamaqtanýyna, turǵyn úiine, meditsinalyq kómegine, bilim alýyna, tárbiesine jáne olardy saýyqtyrýǵa memleket biýdjeti esebinen qarjy bólinetin sýbektilerge (obektilerge) qatysty memlekettiń sanitariialyq-epidemiologiialyq baqylaý men qadaǵalaý tártibi «Halyq densaýlyǵy jáne densaýlyq saqtaý júiesi týraly» Kodekstiń, sondai-aq «Qazaqstan Respýblikasyndaǵy bala quqyqtary týraly» Zańnyń aiasynda retteletin salaǵa jatqyzylady. Sáikesinshe tiisti normalar Kásipkerlik kodeksten alynyp tastalady.
Túzetýlerdiń úshinshi blogy bilim berý salasyndaǵy keibir túitkildi máselelerdi sheshedi.
Budan bylai tehnikalyq jáne kásiptik, orta bilimnen keiingi bilim berý uiymdary Oqý-aǵartý ministrligi bekitetin, osyndai uiymdar qyzmetiniń jetistikterin reitingtik kórsetkishterge sai baǵalaý ádistemesine jáne olardy saralaý qaǵidalaryna súiene otyryp saralanady. Al joǵary nemese joǵary oqý ornynan keiingi bilim berý uiymdarynyń saralanýy Ǵylym jáne joǵary bilim ministrligi bekitetin baǵalaý ádistemesi men qaǵidalaryna negizdeledi.
Túzetýlerdiń tórtinshi blogy mádeniet salasyndaǵy birqatar máseleni sheshýge baǵyttalǵan.
Kontsert ótkizý kezinde fonogramma paidalanýǵa tyiym salynady (Bul erejeniń televiziialyq jazbalarǵa, kontsert ótkizýge arnaiy beiimdelmegen jáne arnalmaǵan oryndarǵa qatysy joq). Sondai-aq avtorlyq quqyq obektisi sanalatyn shyǵarmalardy mass-mediada nemese onlain-platformalarda jariia túrde paidalanǵan kez kelgen jaǵdaida avtordy (avtorlardy) kórsetý mindetti.
Kitaphana qoryn baiytý jáne saqtaý sharalaryn qabyldaý budan bylai jergilikti atqarýshy organdardyń quzyretine kiredi.
