Aqtóbede nemeresi pyshaqtaǵan zeinetkerdiń jaǵdaiy belgili boldy, dep habarlaidy Dalanews.kz stan.kz-ke siltep.
Nemeresiniń shabýylynan aman qalǵan 71 jastaǵy qariia eseńgirep qalǵan. Ol sol kúndi esine de alǵysy kelmei, túnde shoshyp oianatynyn aitqan.
Aqtóbede anasyn pyshaqtap óltirdi degen mektep oqýshysy ájesine de aýyr jaraqat salǵan. 71 jastaǵy zeinetker 2 jeltoqsanda túngi saǵat 01:40-ta №1 qalalyq kópsalaly aýrýhanaǵa jetkizilgen.
Dárigerlerdiń aitýynsha, qariianyń denesinde kóptegen jaraqat bar.
"Bes jerinen jaraqat alǵan, qabyrǵasy synǵan. Keýde qýysyna, ish qýysyna jabyq jaraqat salǵan. Aiaq-qoly kesilgen. Barlyq diagnostikalyq shara júrgizildi. Qazir jaǵdaiy ortasha aýyr. Em tolyq júrgizilip jatyr. “Estimeimin, balam estimeimin" dep eshteńe aitpaidy. Áńgimesin aitady. Biraq suraq qoisań, estimeidi", – dedi №1 qalalyq kópsalaly aýrýhananyń bas dárigeri Qadirbek Imanbaev.
Eske salaiyq, buǵan deiin Aqtóbede jantúrshigerlik oqiǵa tirkeldi. 16 jastaǵy jasóspirim óz anasyn óltirip, ájesin jaralaǵan degen kúdikke ilindi.
