Almaty oblysynda qoqys polıgonynan shyqqan órt úsh kúnnen beri sóndirilgen joq, dep habarlaıdy Dalanews.kz.
Ákimdik aýa sapasy baqylaýda dep sendirip otyr.
Almaty–Qonaev avtojolynyń 35-shaqyrymyndaǵy turmystyq qaldyqtar polıgonynda shyqqan órtke baılanysty jaqyn mańdaǵy eldi mekenderde aýa sapasyna sanıtarlyq-epıdemıologıalyq monıtorıń júrgizilgen.
15–16 qyrkúıek kúnderi 288 synama alynyp, olardyń bir bóliginde shekti mánnen asyp ketken kórsetkishter anyqtaldy. Osyǵan oraı turǵyndarǵa, ásirese balalar men qarttarǵa jáne tynys alý joldarynyń sozylmaly aýrýy bar adamdarǵa aldyn alý sharalaryn saqtaý jóninde nusqaýlyq berildi.
17 qyrkúıekte sol núktelerde júrgizilgen qaıta tekserýler normalarǵa saı nátıjeler kórsetken.
KTK málimetinshe,qoqys polıgonynyń qazirgi jaǵdaıy tipti kúrdelene tústi – aýmaq túgeldeı qalyń tútinge oranǵan. Qalada jańbyr jaýǵanymen, tereńdigi on metrden asatyn jer astyndaǵy jalyn áli basylar emes. Kerisinshe, tútin burynǵydan da qoıýlanyp ketti.
Mektepter onlaın oqýǵa kóshti
Qaýipsizdik úshin mańaıdaǵy úsh mektep dástúrli oqýdan onlaın formatqa aýysýǵa májbúr boldy. Órttiń saldary oqýshylardyń da kúndelikti ómirine áser etip otyr.
Ákim oqıǵa ornynda
Jaǵdaıdy baqylaýǵa oblys ákimi kelip, arnaıy komısıa quryldy. Saraptama nátıjesine qaraı tótenshe jaǵdaı jarıalanýy múmkin ekeni de aıtyldy.
Órtti sóndirýge júzdegen maman tartyldy
Qyzyl jalyndy aýyzdyqtaý úshin 200-den asa maman men júzge jýyq tehnıka jumyldyrylǵan. Keıbiri basqa óńirlerden shaqyrylǵan. Alty órt sóndirý alańy jasaqtalyp, mańaıdaǵy Tereń-Qara ózeninen úzdiksiz sý tartylyp jatyr.
Órt aýmaǵy
Úsh kún buryn bastalǵan órttiń sebebi ázirge belgisiz. Polıgonnyń jalpy kólemi 35 gektar bolsa, sonyń 15 gektary otqa oranǵan.
