«استانا – ەسىرتكىسىز قالا» اكسياسى اياسىندا سارىارقا اۋدانىندا جەڭىل اتلەتيكالىق جۇگىرىس ءوتتى،- دەپ حابارلايدى Dalanews.kz

وسى جولعى باستى ەرەكشەلىگى – قاتىسۋشىلار جاڭا مارشرۋت بويىنشا باقتارىن سىنادى.

4 شاقىرىمدىق قاشىقتىققا جالعاسقان جۇگىرىس ارباتتاعى كەنەسارى حان ەسكەرتكىشىنىڭ الدىنان باستالىپ، ىرىسكەلدى قاجى مەشىتىنىڭ جانىندا مارەسىنە جەتتى.

«استانا – ەسىرتكىسىز قالا» ۇرانىمەن كەزەكتى جۇگىرىسىمىزدى ۇيىمداستىردىق. بۇل جولى جۇگىرۋ باعىتى جاڭارتىلدى. كەزەكتى رەت قاتىسۋشىلارىمىز ەسىل وزەنىنىڭ بويىمەن جاڭا باعىتتا جۇگىردى. قاتىسۋشىلار اسەرلەرىمەن ءبولىسىپ، رازى بولىپ جاتىر. سونداي-اق جۇگىرىسىمىز ءجيى ۇيىمداستىرىلسا دا مەدالدارىمىز ۇنەمى جاڭارتىلىپ تۇرادى. بۇنىڭ ءوزى قوسىمشا ەموسيا بەرەتىندىگى ءسوزسىز. جۇگىرىستىڭ ارقاسىندا قالا تۇرعىندارى دەمالىستىڭ تاڭىن سپورتپەن باستاۋدى ادەتكە اينالدىرىپ كەلەدى. ءقازىردىڭ وزىندە وتباسىمەن بىرگە تولىقتاي قاتىساتىنداردىڭ سانى ارتىپ جاتقانى انىق بايقالادى. ەلوردامىزدا جۇگىرۋ مەن ۆەلوشەرۋدەن وزگە بۇقارالىق سپورتتىڭ دا ءتۇرىن وتكىزۋگە اتسالىسىپ جاتىرمىز»، – دەدى استانا قالاسى اكىمدىگىنىڭ سپورتتىق-بۇقارالىق ءىس-شارالاردى وتكىزۋ ديرەكسياسى باسشىسىنىڭ ورىنباسارى ەرجىگىت وسەرباي.

جارىسقا 1000-عا جۋىق اۋەسقوي جۇگىرۋشى قاتىسىپ، 9:00-دە 4 شاقىرىمدىق قاشىقتىقتى باستاپ كەتتى.

«10 جىلدان استام ۋاقىت بويى جۇگىرىپ كەلەمىن. بۇگىندە جۇگىرۋ ادەت بولىپ كەتتى. سالاۋاتتى ءومىر سالتىن ءوزىم ارقىلى ناسيحاتتاعاننىڭ ارقاسىندا وزگە تانىستارىم دا وسى جولدى تاڭدادى»، – دەدى جارىسقا قاتىسۋشى جانسۇلتان قالداروۆ.

بۇقارالىق جۇگىرىستىڭ سوڭىندا ادەتتەگىدەي قاتىسۋشىلاردىڭ اراسىندا ۆەلوسيپەد ويناتىلىپ، ەستەلىك مەدال بەرىلدى.