سقو تابيعات قورعاۋ پروكۋراتۋراسىمەن ەسەپكە الىنباعان جانە قورعاۋسىز قالعان مىڭداعان گەكتار ورمان القاپتارى انىقتالدى، دەپ حابارلايدى Dalanews.kz.

قاداعالاۋ ورگانىمەن ورمان شارۋاشىلىعى سالاسىندا مەملەكەتتىك ورمان قورى قۇرامىنا ەنگىزىلمەگەن ورمان القاپتارىن اۋدارۋ شارالارىنىڭ قابىلدانباۋىمەن بايلانىستى زاڭ بۇزۋشىلىقتار انىقتالدى.

ورمان كودەكسىنىڭ 51-1-بابىنا سايكەس وزگە ساناتتاعى جەرلەردەگى تابيعي وسكەن ەكپەلەر مەملەكەتتىك ورمان قورى قۇرامىنا ەنگىزىلۋگە جاتادى.

اتالعان نورماعا قاراماستان، سولتۇستىك قازاقستان وبلىسى اكىمدىگىنىڭ تابيعي رەسۋرستار باسقارماسىنىڭ لاۋازىمدى تۇلعالارى جەرلەردى اۋدارۋ جانە ەسەپكە الىنباعان ورمان القاپتارىنا تۇگەندەۋ جۇرگىزۋ ماسەلەسىندە اۋدان اكىمدەرىمەن ءتيىستى ۇيلەستىرۋدى جۇزەگە اسىرماعان.

پروكۋروردىڭ تالابى بويىنشا جۇرگىزىلگەن تۇگەندەۋ ناتيجەسىندە ايىرتاۋ، ەسىل، جامبىل، قىزىلجار، مامليۋت جانە تيميريازيەۆ اۋداندارىندا مەملەكەتتىك ورمان قورىنان تىس قورعاۋسىز قالعان 9 مىڭ گەكتاردان استام ورماندى جەرلەر انىقتالدى.

پروكۋرورلىق قاداعالاۋ اكتىسىنىڭ نەگىزىندە اكىمدىكپەن بارلىق مۇددەلى ورگانداردىڭ قاتىسۋىمەن كوميسسيا قۇرىلىپ، انىقتالعان ۋچاسكەلەردى مەملەكەتتىك ورمان قورى قۇرامىنا ەنگىزۋ بويىنشا ناقتى مەرزىمدەر مەن جاۋاپتى ورىنداۋشىلاردى بەلگىلەۋمەن جول كارتاسى ازىرلەندى.

كوميسسيانىڭ قابىلداعان شارالارى ناتيجەسىندە قىزىلجار ورمان شارۋاشىلىعى قۇرامىنا 46،2 گەكتار ورماندى جەرلەر ەنگىزىلدى، قالعان ۋچاسكەلەر بويىنشا جۇمىستار جالعاسۋدا.

ءوز مىندەتتەرىن تيىسىنشە ورىنداماعان 4 لاۋازىمدى تۇلعا تارتىپتىك جاۋاپتىلىققا تارتىلدى.

مەملەكەتتىك ورمان قورىن كەڭەيتۋ ارقىلى ەكولوگيالىق جاعدايدى جاقسارتۋداعى مەملەكەت باسشىسىنىڭ ايقىنداعان مەملەكەتتىك ساياساتتىڭ باسىمدىعى ەكەنىن ەسكەرە وتىرىپ، جەرگىلىكتى جانە ۋاكىلەتتى ورگانداردىڭ قىزمەتىن ۇيلەستىرۋ ماقساتىندا ءىس-شارالار وتكىزىلدى.