СҚО табиғат қорғау прокуратурасымен есепке алынбаған және қорғаусыз қалған мыңдаған гектар орман алқаптары анықталды, деп хабарлайды Dalanews.kz.
Қадағалау органымен орман шаруашылығы саласында мемлекеттік орман қоры құрамына енгізілмеген орман алқаптарын аудару шараларының қабылданбауымен байланысты заң бұзушылықтар анықталды.
Орман кодексінің 51-1-бабына сәйкес өзге санаттағы жерлердегі табиғи өскен екпелер мемлекеттік орман қоры құрамына енгізілуге жатады.
Аталған нормаға қарамастан, Солтүстік Қазақстан облысы әкімдігінің табиғи ресурстар басқармасының лауазымды тұлғалары жерлерді аудару және есепке алынбаған орман алқаптарына түгендеу жүргізу мәселесінде аудан әкімдерімен тиісті үйлестіруді жүзеге асырмаған.
Прокурордың талабы бойынша жүргізілген түгендеу нәтижесінде Айыртау, Есіл, Жамбыл, Қызылжар, Мамлют және Тимирязев аудандарында мемлекеттік орман қорынан тыс қорғаусыз қалған 9 мың гектардан астам орманды жерлер анықталды.
Прокурорлық қадағалау актісінің негізінде әкімдікпен барлық мүдделі органдардың қатысуымен комиссия құрылып, анықталған учаскелерді мемлекеттік орман қоры құрамына енгізу бойынша нақты мерзімдер мен жауапты орындаушыларды белгілеумен Жол картасы әзірленді.
Комиссияның қабылдаған шаралары нәтижесінде Қызылжар орман шаруашылығы құрамына 46,2 гектар орманды жерлер енгізілді, қалған учаскелер бойынша жұмыстар жалғасуда.
Өз міндеттерін тиісінше орындамаған 4 лауазымды тұлға тәртіптік жауаптылыққа тартылды.
Мемлекеттік орман қорын кеңейту арқылы экологиялық жағдайды жақсартудағы Мемлекет басшысының айқындаған мемлекеттік саясаттың басымдығы екенін ескере отырып, жергілікті және уәкілетті органдардың қызметін үйлестіру мақсатында іс-шаралар өткізілді.
