25 تامىزدا مەديسينالىق جابدىقتاردى ساتىپ الۋ كەزىندە قىزمەتتىك وكىلەتتىكتى اسىرا پايدالاندى دەگەن كۇدىكپەن قوستاناي وبلىسىندا بىرنەشە لاۋازىمدى تۇلعا ۇستالدى. وبلىستىق پروكۋراتۋرانىڭ رەسمي حابارلاۋىنشا، ۇستالعاندار قاتارىندا بۇرىنعى وبلىستىق دەنساۋلىق ساقتاۋ باسقارماسىنىڭ باسشىسى، اۋداندىق اۋرۋحانانىڭ باس دارىگەرى جانە كاسىپورىن ديرەكتورى بار.وبلىس اكىمى قۇمار اقساقالوۆ كەزەكتەن تىس ءماسليحات سەسسياسىندا بۇل ماسەلەگە قاتىستى تۇسىنىكتەمە بەرىپ، تەرگەۋدى ۋاكىلەتتى ورگاندار جۇرگىزىپ جاتقانىن جانە تۇپكىلىكتى شەشىمدى سوت قابىلدايتىنىن اتاپ ءوتتى.
وسى وقيعادان كەيىن قوستاناي وبلىسى اكىمىنىڭ ورىنباسارى گۇلبارام مۇساعازينا ءوزىنىڭ اتىنا ايتىلعان ايىپتاۋلارعا قاتىستى جەكە مالىمدەمە جاسادى، دەپ حابارلايدى Dalanews.kz.
"ايىپتاۋلار - نەگىزسىز"
مۇساعازينانىڭ سوزىنشە، ونىڭ اتى مەديسينالىق جابدىقتاردى ساتىپ الۋمەن بايلانىستى ورىنسىز اتالىپ ءجۇر.
"وتكەن جىلدىڭ شىلدە ايىنان باستاپ مەن بۇل قۇرىلىمدى قاداعالاپ كەلەمىن. تەرگەۋ ورگاندارى تاراپىنان ماعان قاتىستى ەشقانداي سۇراق قويىلعان جوق. دەمەك، اڭگىمە مەنىڭ تاعايىندالۋىما دەيىن جاسالعان ارەكەتتەر جايىندا بولىپ وتىر. سوندىقتان سوڭعى ۋاقىتتا جاريا كەڭىستىكتە مەنىڭ اتىما ايتىلعان نەگىزسىز ايىپتاۋلارعا جاۋاپ بەرۋدى ءجون كورىپ وتىرمىن"، – دەدى ول.
ول مەديسينالىق كومەكتىڭ ساپاسى مەن قولجەتىمدىلىگىن قامتاماسىز ەتۋ - نەگىزگى باسىمدىق ەكەنىن اتاپ ءوتتى.
اكىم ورىنباسارى اتاپ وتكەندەي، داۋ تۋعىزعان ۆيبرواكۋستيكالىق اپپاراتتار وكپە اۋرۋلارىن ەمدەۋدە ماڭىزدى ءرول اتقارادى.
"بۇل جابدىق وكپەنىڭ ءارتۇرلى اۋرۋلارىنا، سونىڭ ىشىندە حوبل، برونحوەكتاز، استما، مۋكوۆيسيدوز، پنيەۆمونيا جانە باسقا دا جاعدايلاردا ءتيىمدى ءارى جۇمساق تەراپيا جۇرگىزۋگە مۇمكىندىك بەرەدى"، – دەدى مۇساعازينا.
ونىڭ ايتۋىنشا، كوروناۆيرۋس پاندەمياسىنان كەيىن تىنىس الۋ ورگاندارى اۋرۋلارى كۇرت وسكەن. تەك 2024 جىلى عانا وبلىستا 286 مىڭنان استام ادام مەديسينالىق كومەككە جۇگىنگەن. قازىرگى تاڭدا تۇراقتى ەسەپتە تۇرعان 10،5 مىڭ ناۋقاس ءوز اۋدانىنان شىقپاي-اق اتالعان جابدىق ارقىلى ەم-شارا الىپ وتىر.
اپپاراتتار وبلىستىڭ پوليكلينيكالارىنداعى فيزيوتەراپيالىق كابينەتتەرگە، كەيبىر اۋداندارداعى اۋىلدىق امبۋلاتوريالار مەن فەلدشەرلىك پۋنكتتەرگە دە ورناتىلعان.
"تەك جانساقتاۋ بولىمدەرىنە عانا ارنالعان دەۋ - جالا"
اكىم ورىنباسارى اپپاراتتار تەك قانا جانساقتاۋ بولىمشەلەرىندە قولدانىلادى دەگەن پىكىردى "جالعان ايىپ" دەپ اتادى.
"2024 جىلدىڭ باسىنان بەرى وبلىستىڭ مەديسينالىق مەكەمەلەرىندە بۇل اپپاراتتاردى پايدالانا وتىرىپ، 30 مىڭنان استام پروسەدۋرا جۇرگىزىلدى. مەديسينا ماماندارىنىڭ ايتۋىنشا، جابدىق ناۋقاستاردىڭ قالپىنا كەلۋىن جەدەلدەتىپ قانا قويماي، مەديسينالىق كومەكتىڭ ساپاسىن دا ارتتىرادى"، – دەدى ول.
"ساتىپ الۋلار – دەنساۋلىق ساقتاۋ باسقارماسىنىڭ قۇزىرەتىندە"
مۇساعازينا مەملەكەتتىك ساتىپ الۋ ماسەلەسىنە قاتىستى دا پىكىر ءبىلدىردى.
"زاڭعا سايكەس، مەديسينالىق جابدىق پەن دارى-دارمەك ساتىپ الۋ تۋرالى شەشىمدەردى وبلىستىق دەنساۋلىق ساقتاۋ باسقارماسى مەن مەديسينالىق ۇيىمدار قابىلدايدى. بۇل پروسەستەردى ءماسليحات دەپۋتاتتارى مەن ۋاكىلەتتى ورگاندار باقىلايدى. ال اكىمدىكتەردىڭ باقىلاۋ فۋنكسياسى جوق. بۇل – بارىنە ورتاق زاڭ تالابى"، – دەدى ول.
"مەنىڭ اتىمدى جامىلىپ جالا جاپتى"
اكىم ورىنباسارى ءوزىنىڭ اتىنا قاتىستى جالعان ايىپتاۋلارعا بايلانىستى سوتقا جۇگىنەتىنىن جەتكىزدى.
"مەنىڭ اتىما باق-تا بىرنەشە رەت شىققان جالعان ايىپتاۋلارعا بايلانىستى ار-نامىسىمدى، ابىرويىمدى جانە ىسكەرلىك بەدەلىمدى قورعاۋ قۇقىعىمدى پايدالانىپ، سوت ورگاندارىنا جۇگىنەمىن. مەملەكەتتىك قىزمەتتە قابىلداعان بارلىق شەشىمدەرىم تەك زاڭعا جانە قوعامعا قىزمەت ەتۋ قاعيداتتارىنا نەگىزدەلدى. مەملەكەتتىك قىزمەتكە مەن حالقىم ءۇشىن ەڭبەك ەتۋ ماقساتىمەن كەلدىم جانە بۇل جولىمدى جالعاستىرامىن"، – دەدى مۇساعازينا.
ول قوعامدى اسىعىس قورىتىندى جاساماۋعا جانە رەسمي تەكسەرىس ناتيجەلەرىن كۇتۋگە شاقىردى.
"مەن ادىلدىك ورنايدى جانە قوعامنىڭ سەنىمى ساقتالادى دەپ سەنەمىن. دالەلسىز ايىپتاۋلاردى تاراتۋدان اۋلاق بولۋعا شاقىرامىن"، – دەپ ءسوزىن تۇيىندەدى ول.
اكىمدىك نە دەيدى؟
قوستاناي وبلىسى اكىمدىگى جالعان اقپاراتتى جوققا شىعاردى.
اكىمدىك تۇسىندىرگەندەي، ءسوز – تىنىس الۋ جۇيەسى اۋرۋلارىن ەمدەۋگە ارنالعان وتاندىق مەديسينالىق جابدىق جايىندا. 2024 جىلدان بەرى وڭىردەگى مەديسينالىق ۇيىمدارعا وسىنداي 57 اپپارات جەتكىزىلگەن. ءارقايسىسىنىڭ ورتاشا قۇنى – 16،2 ملن تەڭگە. ساتىپ الۋ كونكۋرستىق نەگىزدە جۇرگىزىلىپ، جەڭىمپاز بولىپ "QUORU" ج ش س تانىلعان.
اپپاراتتار رەانيماسيا، ينفەكسيالىق جانە پۋلمونولوگيالىق بولىمشەلەردە قولدانىلادى. قوستاناي، ارقالىق جانە ءجىتىقارا قالالىق اۋرۋحانالارىندا ورناتىلعان قۇرىلعىلاردىڭ كومەگىمەن 2024 جىلدان بەرى 30 مىڭنان استام پروسەدۋرا جاسالعان.
"بارلىق ساتىپ الۋ تەندەرلىك راسىمدەر ارقىلى وتەدى جانە بيۋدجەت باقىلاۋىندا. „جەكە ماقسات“ تۋرالى اڭگىمەلەر شىندىققا جاناسپايدى. اقپارات قۇرالدارى مەن جۇرتشىلىقتى تەك رەسمي دەرەككوزدەرگە سەنۋگە شاقىرامىز"، – دەلىنگەن وبلىس اكىمدىگىنىڭ مالىمدەمەسىندە.
ەسكە سالايىق، كۇنى كەشە قوستاناي وبلىسىندا دەنساۋلىق ساقتاۋ باسقارماسىنىڭ بۇرىنعى باسشىسى ۇستالعانىن حابارلاعان ەدىك.
ايماقتىق پروكۋراتۋرانىڭ مالىمەتىنشە، دەنساۋلىق ساقتاۋ باسقارماسىنىڭ بۇرىنعى باسشىسى، اۋداندىق اۋرۋحانانىڭ باس دارىگەرى جانە كوممەرسيالىق كاسىپورىن ديرەكتورى مەديسينالىق قۇرال-جابدىقتاردى ساتىپ الۋ كەزىندە قىزمەتتىك وكىلەتتىكتەرىن اسىرا پايدالاندى دەگەن كۇدىكپەن ۇستالدى.
