25 tamyzda meditsinalyq jabdyqtardy satyp alý kezinde qyzmettik ókilettikti asyra paidalandy degen kúdikpen Qostanai oblysynda birneshe laýazymdy tulǵa ustaldy. Oblystyq prokýratýranyń resmi habarlaýynsha, ustalǵandar qatarynda burynǵy oblystyq densaýlyq saqtaý basqarmasynyń basshysy, aýdandyq aýrýhananyń bas dárigeri jáne kásiporyn direktory bar.Oblys ákimi Qumar Aqsaqalov kezekten tys máslihat sessiiasynda bul máselege qatysty túsinikteme berip, tergeýdi ýákiletti organdar júrgizip jatqanyn jáne túpkilikti sheshimdi sot qabyldaitynyn atap ótti.
Osy oqiǵadan keiin Qostanai oblysy ákiminiń orynbasary Gúlbaram Musaǵazina óziniń atyna aitylǵan aiyptaýlarǵa qatysty jeke málimdeme jasady, dep habarlaidy Dalanews.kz.
"Aiyptaýlar - negizsiz"
Musaǵazinanyń sózinshe, onyń aty meditsinalyq jabdyqtardy satyp alýmen bailanysty orynsyz atalyp júr.
"Ótken jyldyń shilde aiynan bastap men bul qurylymdy qadaǵalap kelemin. Tergeý organdary tarapynan maǵan qatysty eshqandai suraq qoiylǵan joq. Demek, áńgime meniń taǵaiyndalýyma deiin jasalǵan áreketter jaiynda bolyp otyr. Sondyqtan sońǵy ýaqytta jariia keńistikte meniń atyma aitylǵan negizsiz aiyptaýlarǵa jaýap berýdi jón kórip otyrmyn", – dedi ol.
Ol meditsinalyq kómektiń sapasy men qoljetimdiligin qamtamasyz etý - negizgi basymdyq ekenin atap ótti.
Ákim orynbasary atap ótkendei, daý týǵyzǵan vibroakýstikalyq apparattar ókpe aýrýlaryn emdeýde mańyzdy ról atqarady.
"Bul jabdyq ókpeniń ártúrli aýrýlaryna, sonyń ishinde HOBL, bronhoektaz, astma, mýkovistsidoz, pnevmoniia jáne basqa da jaǵdailarda tiimdi ári jumsaq terapiia júrgizýge múmkindik beredi", – dedi Musaǵazina.
Onyń aitýynsha, koronavirýs pandemiiasynan keiin tynys alý organdary aýrýlary kúrt ósken. Tek 2024 jyly ǵana oblysta 286 myńnan astam adam meditsinalyq kómekke júgingen. Qazirgi tańda turaqty esepte turǵan 10,5 myń naýqas óz aýdanynan shyqpai-aq atalǵan jabdyq arqyly em-shara alyp otyr.
Apparattar oblystyń poliklinikalaryndaǵy fizioterapiialyq kabinetterge, keibir aýdandardaǵy aýyldyq ambýlatoriialar men feldsherlik pýnktterge de ornatylǵan.
"Tek jansaqtaý bólimderine ǵana arnalǵan deý - jala"
Ákim orynbasary apparattar tek qana jansaqtaý bólimshelerinde qoldanylady degen pikirdi "jalǵan aiyp" dep atady.
"2024 jyldyń basynan beri oblystyń meditsinalyq mekemelerinde bul apparattardy paidalana otyryp, 30 myńnan astam protsedýra júrgizildi. Meditsina mamandarynyń aitýynsha, jabdyq naýqastardyń qalpyna kelýin jedeldetip qana qoimai, meditsinalyq kómektiń sapasyn da arttyrady", – dedi ol.
"Satyp alýlar – densaýlyq saqtaý basqarmasynyń quzyretinde"
Musaǵazina memlekettik satyp alý máselesine qatysty da pikir bildirdi.
"Zańǵa sáikes, meditsinalyq jabdyq pen dári-dármek satyp alý týraly sheshimderdi oblystyq densaýlyq saqtaý basqarmasy men meditsinalyq uiymdar qabyldaidy. Bul protsesterdi máslihat depýtattary men ýákiletti organdar baqylaidy. Al ákimdikterdiń baqylaý fýnktsiiasy joq. Bul – bárine ortaq zań talaby", – dedi ol.
"Meniń atymdy jamylyp jala japty"
Ákim orynbasary óziniń atyna qatysty jalǵan aiyptaýlarǵa bailanysty sotqa júginetinin jetkizdi.
"Meniń atyma BAQ-ta birneshe ret shyqqan jalǵan aiyptaýlarǵa bailanysty ar-namysymdy, abyroiymdy jáne iskerlik bedelimdi qorǵaý quqyǵymdy paidalanyp, sot organdaryna júginemin. Memlekettik qyzmette qabyldaǵan barlyq sheshimderim tek zańǵa jáne qoǵamǵa qyzmet etý qaǵidattaryna negizdeldi. Memlekettik qyzmetke men halqym úshin eńbek etý maqsatymen keldim jáne bul jolymdy jalǵastyramyn", – dedi Musaǵazina.
Ol qoǵamdy asyǵys qorytyndy jasamaýǵa jáne resmi tekseris nátijelerin kútýge shaqyrdy.
"Men ádildik ornaidy jáne qoǵamnyń senimi saqtalady dep senemin. Dálelsiz aiyptaýlardy taratýdan aýlaq bolýǵa shaqyramyn", – dep sózin túiindedi ol.
Ákimdik ne deidi?
Qostanai oblysy ákimdigi jalǵan aqparatty joqqa shyǵardy.
Ákimdik túsindirgendei, sóz – tynys alý júiesi aýrýlaryn emdeýge arnalǵan otandyq meditsinalyq jabdyq jaiynda. 2024 jyldan beri óńirdegi meditsinalyq uiymdarǵa osyndai 57 apparat jetkizilgen. Árqaisysynyń ortasha quny – 16,2 mln teńge. Satyp alý konkýrstyq negizde júrgizilip, jeńimpaz bolyp "QUORU" JShS tanylǵan.
Apparattar reanimatsiia, infektsiialyq jáne pýlmonologiialyq bólimshelerde qoldanylady. Qostanai, Arqalyq jáne Jitiqara qalalyq aýrýhanalarynda ornatylǵan qurylǵylardyń kómegimen 2024 jyldan beri 30 myńnan astam protsedýra jasalǵan.
"Barlyq satyp alý tenderlik rásimder arqyly ótedi jáne biýdjet baqylaýynda. „Jeke maqsat“ týraly áńgimeler shyndyqqa janaspaidy. Aqparat quraldary men jurtshylyqty tek resmi derekkózderge senýge shaqyramyz", – delingen oblys ákimdiginiń málimdemesinde.
Eske salaiyq, kúni keshe Qostanai oblysynda densaýlyq saqtaý basqarmasynyń burynǵy basshysy ustalǵanyn habarlaǵan edik.
Aimaqtyq prokýratýranyń málimetinshe, densaýlyq saqtaý basqarmasynyń burynǵy basshysy, aýdandyq aýrýhananyń bas dárigeri jáne kommertsiialyq kásiporyn direktory meditsinalyq qural-jabdyqtardy satyp alý kezinde qyzmettik ókilettikterin asyra paidalandy degen kúdikpen ustaldy.
