25 тамызда медициналық жабдықтарды сатып алу кезінде қызметтік өкілеттікті асыра пайдаланды деген күдікпен Қостанай облысында бірнеше лауазымды тұлға ұсталды. Облыстық прокуратураның ресми хабарлауынша, ұсталғандар қатарында бұрынғы облыстық денсаулық сақтау басқармасының басшысы, аудандық аурухананың бас дәрігері және кәсіпорын директоры бар.Облыс әкімі Құмар Ақсақалов кезектен тыс мәслихат сессиясында бұл мәселеге қатысты түсініктеме беріп, тергеуді уәкілетті органдар жүргізіп жатқанын және түпкілікті шешімді сот қабылдайтынын атап өтті.
Осы оқиғадан кейін Қостанай облысы әкімінің орынбасары Гүлбарам Мұсағазина өзінің атына айтылған айыптауларға қатысты жеке мәлімдеме жасады, деп хабарлайды Dalanews.kz.
"Айыптаулар - негізсіз"
Мұсағазинаның сөзінше, оның аты медициналық жабдықтарды сатып алумен байланысты орынсыз аталып жүр.
"Өткен жылдың шілде айынан бастап мен бұл құрылымды қадағалап келемін. Тергеу органдары тарапынан маған қатысты ешқандай сұрақ қойылған жоқ. Демек, әңгіме менің тағайындалуыма дейін жасалған әрекеттер жайында болып отыр. Сондықтан соңғы уақытта жария кеңістікте менің атыма айтылған негізсіз айыптауларға жауап беруді жөн көріп отырмын", – деді ол.
Ол медициналық көмектің сапасы мен қолжетімділігін қамтамасыз ету - негізгі басымдық екенін атап өтті.
Әкім орынбасары атап өткендей, дау туғызған виброакустикалық аппараттар өкпе ауруларын емдеуде маңызды рөл атқарады.
"Бұл жабдық өкпенің әртүрлі ауруларына, соның ішінде ХОБЛ, бронхоэктаз, астма, муковисцидоз, пневмония және басқа да жағдайларда тиімді әрі жұмсақ терапия жүргізуге мүмкіндік береді", – деді Мұсағазина.
Оның айтуынша, коронавирус пандемиясынан кейін тыныс алу органдары аурулары күрт өскен. Тек 2024 жылы ғана облыста 286 мыңнан астам адам медициналық көмекке жүгінген. Қазіргі таңда тұрақты есепте тұрған 10,5 мың науқас өз ауданынан шықпай-ақ аталған жабдық арқылы ем-шара алып отыр.
Аппараттар облыстың поликлиникаларындағы физиотерапиялық кабинеттерге, кейбір аудандардағы ауылдық амбулаториялар мен фельдшерлік пункттерге де орнатылған.
"Тек жансақтау бөлімдеріне ғана арналған деу - жала"
Әкім орынбасары аппараттар тек қана жансақтау бөлімшелерінде қолданылады деген пікірді "жалған айып" деп атады.
"2024 жылдың басынан бері облыстың медициналық мекемелерінде бұл аппараттарды пайдалана отырып, 30 мыңнан астам процедура жүргізілді. Медицина мамандарының айтуынша, жабдық науқастардың қалпына келуін жеделдетіп қана қоймай, медициналық көмектің сапасын да арттырады", – деді ол.
"Сатып алулар – денсаулық сақтау басқармасының құзыретінде"
Мұсағазина мемлекеттік сатып алу мәселесіне қатысты да пікір білдірді.
"Заңға сәйкес, медициналық жабдық пен дәрі-дәрмек сатып алу туралы шешімдерді облыстық денсаулық сақтау басқармасы мен медициналық ұйымдар қабылдайды. Бұл процестерді мәслихат депутаттары мен уәкілетті органдар бақылайды. Ал әкімдіктердің бақылау функциясы жоқ. Бұл – бәріне ортақ заң талабы", – деді ол.
"Менің атымды жамылып жала жапты"
Әкім орынбасары өзінің атына қатысты жалған айыптауларға байланысты сотқа жүгінетінін жеткізді.
"Менің атыма БАҚ-та бірнеше рет шыққан жалған айыптауларға байланысты ар-намысымды, абыройымды және іскерлік беделімді қорғау құқығымды пайдаланып, сот органдарына жүгінемін. Мемлекеттік қызметте қабылдаған барлық шешімдерім тек заңға және қоғамға қызмет ету қағидаттарына негізделді. Мемлекеттік қызметке мен халқым үшін еңбек ету мақсатымен келдім және бұл жолымды жалғастырамын", – деді Мұсағазина.
Ол қоғамды асығыс қорытынды жасамауға және ресми тексеріс нәтижелерін күтуге шақырды.
"Мен әділдік орнайды және қоғамның сенімі сақталады деп сенемін. Дәлелсіз айыптауларды таратудан аулақ болуға шақырамын", – деп сөзін түйіндеді ол.
Әкімдік не дейді?
Қостанай облысы әкімдігі жалған ақпаратты жоққа шығарды.
Әкімдік түсіндіргендей, сөз – тыныс алу жүйесі ауруларын емдеуге арналған отандық медициналық жабдық жайында. 2024 жылдан бері өңірдегі медициналық ұйымдарға осындай 57 аппарат жеткізілген. Әрқайсысының орташа құны – 16,2 млн теңге. Сатып алу конкурстық негізде жүргізіліп, жеңімпаз болып "QUORU" ЖШС танылған.
Аппараттар реанимация, инфекциялық және пульмонологиялық бөлімшелерде қолданылады. Қостанай, Арқалық және Жітіқара қалалық ауруханаларында орнатылған құрылғылардың көмегімен 2024 жылдан бері 30 мыңнан астам процедура жасалған.
"Барлық сатып алу тендерлік рәсімдер арқылы өтеді және бюджет бақылауында. „Жеке мақсат“ туралы әңгімелер шындыққа жанаспайды. Ақпарат құралдары мен жұртшылықты тек ресми дереккөздерге сенуге шақырамыз", – делінген облыс әкімдігінің мәлімдемесінде.
Еске салайық, күні кеше Қостанай облысында денсаулық сақтау басқармасының бұрынғы басшысы ұсталғанын хабарлаған едік.
Аймақтық прокуратураның мәліметінше, денсаулық сақтау басқармасының бұрынғы басшысы, аудандық аурухананың бас дәрігері және коммерциялық кәсіпорын директоры медициналық құрал-жабдықтарды сатып алу кезінде қызметтік өкілеттіктерін асыра пайдаланды деген күдікпен ұсталды.
