قازاقستان پرەزيدەنتى قاسىم-جومارت توقايەۆ كونستيتۋسيانىڭ 30 جىلدىعىنا ارنالعان كونفەرەنسيادا الەۋمەتتىك سالاداعى باستى رەفورمالاردىڭ ناتيجەلەرىن اتاپ ءوتتى،- دەپ حابارلايدى Dalanews.kz

مەملەكەت باسشىسىنىڭ ايتۋىنشا، كونستيتۋسيالىق رەفورمانىڭ ارقاسىندا ەلدە «ادىلەتتى مەملەكەت» قاعيداتىن جۇزەگە اسىرۋعا جول اشىلدى. سونىڭ ىشىندە حالىققا تيەسىلى تابيعي رەسۋرستاردىڭ يگىلىگىن قامتاماسىز ەتۋ ماقساتىندا «ۇلتتىق قور – بالالارعا» باعدارلاماسى ىسكە قوسىلدى.

– مەنىڭ تاپسىرماممەن ۇلتتىق قوردىڭ جىل سايىنعى ينۆەستيسيالىق تابىسىنىڭ جارتىسى بالالاردىڭ ارنايى ەسەپشوتىنا جىبەرىلەتىن بولدى. بىلتىردان بەرى وسى باعدارلاما اياسىندا 1،5 ميلليارد دوللاردان استام قارجى اۋدارىلدى. بۇل جاس ۇرپاقتىڭ بولاشاعىنا سەنىممەن قاراۋىنا مۇمكىندىك بەرەتىن ماڭىزدى شەشىم، – دەدى پرەزيدەنت.

توقايەۆتىڭ ايتۋىنشا، جاڭارعان كونستيتۋسيا ازاماتتاردىڭ قۇقىقتارى مەن مۇددەلەرىن قورعايتىن تولىققاندى ءارى ءتيىمدى قۇرالعا اينالدى. سونىڭ ناتيجەسىندە بىرنەشە ماڭىزدى زاڭ قابىلداندى.

اتاپ ايتقاندا، بىلتىر ادام ساۋداسىنا قارسى ءىس-قيمىل تۋرالى زاڭ قابىلدانىپ، ەرىكسىز نەكەگە يتەرمەلەۋ ءۇشىن قىلمىستىق جاۋاپكەرشىلىك ەنگىزىلدى. سونداي-اق تۇرمىستىق زورلىق-زومبىلىق ءۇشىن جازا قاتاڭداتىلىپ، ادام ۇرلاعاندارعا دا قاتاڭ شارا قاراستىرىلدى.

بۇدان بولەك، قىلمىستىق سوت پروسەسىن ىزگىلەندىرۋ جانە ونىڭ تيىمدىلىگىن ارتتىرۋ ماقساتىندا ءتيىستى كودەكستەرگە اۋقىمدى تۇزەتۋلەر ەنگىزىلدى. كونستيتۋسيانىڭ مەرەيتويىنا وراي راقىمشىلىق تۋرالى زاڭ قابىلدانىپ، مەملەكەت قىلمىسپەن كۇرەس پەن الەۋمەتتىك ادىلەتتىلىكتى ۇيلەستىرە وتىرىپ، ادامگەرشىلىك قۇندىلىقتارىن باسىمدىققا قويعانىن كورسەتتى.