Qazaqstan Prezidenti Qasym-Jomart Toqaev Konstitýtsiianyń 30 jyldyǵyna arnalǵan konferentsiiada áleýmettik saladaǵy basty reformalardyń nátijelerin atap ótti,- dep habarlaidy Dalanews.kz
Memleket basshysynyń aitýynsha, Konstitýtsiialyq reformanyń arqasynda elde «Ádiletti memleket» qaǵidatyn júzege asyrýǵa jol ashyldy. Sonyń ishinde halyqqa tiesili tabiǵi resýrstardyń igiligin qamtamasyz etý maqsatynda «Ulttyq qor – balalarǵa» baǵdarlamasy iske qosyldy.
– Meniń tapsyrmammen Ulttyq qordyń jyl saiynǵy investitsiialyq tabysynyń jartysy balalardyń arnaiy esepshotyna jiberiletin boldy. Byltyrdan beri osy baǵdarlama aiasynda 1,5 milliard dollardan astam qarjy aýdaryldy. Bul jas urpaqtyń bolashaǵyna senimmen qaraýyna múmkindik beretin mańyzdy sheshim, – dedi Prezident.
Toqaevtyń aitýynsha, jańarǵan Konstitýtsiia azamattardyń quqyqtary men múddelerin qorǵaityn tolyqqandy ári tiimdi quralǵa ainaldy. Sonyń nátijesinde birneshe mańyzdy zań qabyldandy.
Atap aitqanda, byltyr Adam saýdasyna qarsy is-qimyl týraly zań qabyldanyp, eriksiz nekege itermeleý úshin qylmystyq jaýapkershilik engizildi. Sondai-aq turmystyq zorlyq-zombylyq úshin jaza qatańdatylyp, adam urlaǵandarǵa da qatań shara qarastyryldy.
Budan bólek, qylmystyq sot protsesin izgilendirý jáne onyń tiimdiligin arttyrý maqsatynda tiisti kodeksterge aýqymdy túzetýler engizildi. Konstitýtsiianyń mereitoiyna orai Raqymshylyq týraly zań qabyldanyp, memleket qylmyspen kúres pen áleýmettik ádilettilikti úilestire otyryp, adamgershilik qundylyqtaryn basymdyqqa qoiǵanyn kórsetti.
