جاھاندى جايلاعان ەكونوميكالىق سىن-قاتەرلەرگە قاراماستان قازاقستان مەن جۇڭگو ساۋدا-ەكونوميكالىق بايلانىستارى ايتارلىقتاي دامىپ كەلەدى. قازاقستان پرەزيدەنتى قاسىم-جومارت توقايەۆ قىتايلىق China Daily باسىلىمىندا جاريالانعان «قازاقستان مەن قىتايدىڭ بەرىك ءارى سەنىمدى قارىم-قاتىناسى - تابىستى ىنتىماقتاستىقتىڭ كەپىلى» اتتى ماقالاسىندا وسىلاي دەدى، دەپ حابارلايدى Dalanews.kz.
جاھاندى جايلاعان ەكونوميكالىق سىن-قاتەرلەرگە قاراماستان ەلدەرىمىزدىڭ ساۋدا-ەكونوميكالىق بايلانىستارى ايتارلىقتاي دامىپ كەلەدى. 2024 جىلى ەكىجاقتى ساۋدا-ساتتىق كولەمى 44 ميلليارد دوللارعا جەتتى.
"بۇل – تاريحي مەجە. وسىلايشا، جۇڭگو قازاقستاننىڭ ەڭ ءىرى ساۋدا-ەكونوميكالىق سەرىكتەسى رەتىندە پوزيسياسىن كۇشەيتتى. 2005 جىلدان بەرى قىتايلىق كاسىپورىندار قازاقستانعا 27 ميلليارد دوللاردان استام ينۆەستيسيا قۇيدى. بۇگىنگى تاڭدا جۇڭگو كاپيتالىنىڭ ۇلەسى بار التى مىڭعا جۋىق كومپانيا جۇمىس ىستەيدى. ولار ەلىمىزدىڭ تەحنولوگيالىق تۇرعىدان دامۋىنا ىقپال ەتىپ، ونەركاسىپتى جاڭعىرتۋ ىسىندە ماڭىزدى ءرول اتقارادى"، - دەيدى پرەزيدەنت.
مەملەكەت باسشىسى قازاقستان مەن جۇڭگو – ۇلى جىبەك جولى زامانىنان بەرى بىر-بىرىمەن بىتە قايناسقان تاعدىرلاس ەلدەر ەكەنىن اتاپ ءوتتى.
"ءقازىر ءبىز وسى تامىرلاستىقتىڭ نەگىزىندە جاڭا كۇرە جولدار سالۋعا كىرىستىك. پرەزيدەنت سي ءسزينپيننىڭ العاش رەت 2013 جىلى استانادا جاريالاعان «ءبىر بەلدەۋ، ءبىر جول» باستاماسى تاريحي ىقپالداستىقتىڭ جارقىن مىسالى سانالادى"، - دەيدى پرەزيدەنت.
