قازاقستان رەسپۋبليكاسى كونستيتۋسيالىق سوتىنىڭ ءتوراعاسى ەلۆيرا ازيموۆا «كونستيتۋسيا جانە مەملەكەتتىلىك: قۇقىق جانە بولاشاق ديالوگى» حالىقارالىق عىلىمي-پراكتيكالىق كونفەرەنسياسى اياسىندا قازاقستان رەسپۋبليكاسىنىڭ پرەزيدەنتى اتىنان ەلىمىزدىڭ قۇقىقتىق جۇيەسىنىڭ دامۋىنا ەلەۋلى ۇلەس قوسقان ادامدارعا «قازاقستان رەسپۋبليكاسىنىڭ كونستيتۋسياسىنا 30 جىل» مەرەيتويلىق مەدالدارىن تابىس ەتتى، دەپ حابارلايدى Dalanews.kz.

مەرەيتويلىق مەدال ەلىمىزدىڭ اتا زاڭىنىڭ 30 جىلدىعىنا وراي تاعايىندالعان جانە قازاقستان رەسپۋبليكاسى كونستيتۋسياسىنىڭ ۇستەمدىگىن قامتاماسىز ەتۋگە، ەل تاۋەلسىزدىگىن، قازاقستاندىق قوعامداعى كەلىسىم مەن تۇراقتىلىقتى نىعايتۋعا، ادامنىڭ جانە ازاماتتىڭ كونستيتۋسيالىق قۇقىقتارى مەن بوستاندىقتارىن قورعاۋعا، كونستيتۋسيوناليزم يدەيالارى مەن قاعيداتتارىن قالىپتاستىرۋعا جانە دامىتۋعا ەلەۋلى ۇلەس قوسقان قازاقستان رەسپۋبليكاسىنىڭ ازاماتتارى مەن شەتەل ازاماتتارىنا بەرىلەدى.

«كونستيتۋسيا – ازاماتتاردىڭ قۇقىقتارى مەن بوستاندىقتارىنىڭ نەگىزگى كەپىلى، تاۋەلسىزدىك پەن مەملەكەتتىك بيلىكتىڭ سيمۆولى. اتا زاڭىمىزدىڭ 30 جىلدىعىن اتاپ ءوتۋ بارىسىندا ءبىز ءوز ەڭبەگى ارقىلى قازاقستاندا جانە ەلىمىزدەن تىس جەردە زاڭ ۇستەمدىگىن نىعايتۋعا جانە دەموكراتيالىق قۇندىلىقتاردى ىلگەرىلەتۋگە ۇلەس قوسقان ادامداردى قۇرمەتتەيمىز»، – دەپ اتاپ ءوتتى ءوز سوزىندە ەلۆيرا ازيموۆا.

ماراپاتتالعانداردىڭ قاتارىندا جەتەكشى قۇقىقتانۋشى عالىمدار، كونستيتۋسيوناليستەر، جوعارى وقۋ ورىندارىنىڭ وقىتۋشىلارى، ادام قۇقىقتارى جانە كاسىپكەرلەردىڭ قۇقىقتارىن قورعاۋ جونىندەگى ومبۋدسمەندەر، مەملەكەتتىك ورگاندار مەن كاسىبي زاڭ قوعامداستىعىنىڭ، سونداي-اق حالىقارالىق ۇيىمداردىڭ وكىلدەرى بار.

سونداي-اق، مەملەكەت باسشىسىنىڭ اتىنان مەرەيتويلىق مەدالداردى كونستيتۋسيالىق سوت ءتوراعاسىنىڭ ورىنباسارى باقىت نۇرمۇحانوۆ Maqsut Narikbayev University الاڭىندا وتكەن كونفەرەنسيانىڭ سەسسياسى بارىسىندا، سونداي-اق كونستيتۋسيالىق سوتتىڭ سۋدياسى ەركىن وڭعاربايەۆ ل.ن.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ بازاسىندا وتكەن كونفەرەنسيانىڭ سەسسياسى شەڭبەرىندە ەڭبەك سىڭىرگەن ادامدارعا تابىس ەتتى.