Qazaqstan Respýblikasy Konstitýtsiialyq Sotynyń Tóraǵasy Elvira Azimova «Konstitýtsiia jáne memlekettilik: quqyq jáne bolashaq dialogy» halyqaralyq ǵylymi-praktikalyq konferentsiiasy aiasynda Qazaqstan Respýblikasynyń Prezidenti atynan elimizdiń quqyqtyq júiesiniń damýyna eleýli úles qosqan adamdarǵa «Qazaqstan Respýblikasynyń Konstitýtsiiasyna 30 jyl» mereitoilyq medaldaryn tabys etti, dep habarlaidy Dalanews.kz.
Mereitoilyq medal elimizdiń Ata zańynyń 30 jyldyǵyna orai taǵaiyndalǵan jáne Qazaqstan Respýblikasy Konstitýtsiiasynyń ústemdigin qamtamasyz etýge, el táýelsizdigin, qazaqstandyq qoǵamdaǵy kelisim men turaqtylyqty nyǵaitýǵa, adamnyń jáne azamattyń konstitýtsiialyq quqyqtary men bostandyqtaryn qorǵaýǵa, konstitýtsionalizm ideialary men qaǵidattaryn qalyptastyrýǵa jáne damytýǵa eleýli úles qosqan Qazaqstan Respýblikasynyń azamattary men shetel azamattaryna beriledi.
«Konstitýtsiia – azamattardyń quqyqtary men bostandyqtarynyń negizgi kepili, táýelsizdik pen memlekettik biliktiń simvoly. Ata zańymyzdyń 30 jyldyǵyn atap ótý barysynda biz óz eńbegi arqyly Qazaqstanda jáne elimizden tys jerde zań ústemdigin nyǵaitýǵa jáne demokratiialyq qundylyqtardy ilgeriletýge úles qosqan adamdardy qurmetteimiz», – dep atap ótti óz sózinde Elvira Azimova.
Marapattalǵandardyń qatarynda jetekshi quqyqtanýshy ǵalymdar, konstitýtsionalister, joǵary oqý oryndarynyń oqytýshylary, adam quqyqtary jáne kásipkerlerdiń quqyqtaryn qorǵaý jónindegi ombýdsmender, memlekettik organdar men kásibi zań qoǵamdastyǵynyń, sondai-aq halyqaralyq uiymdardyń ókilderi bar.
Sondai-aq, Memleket basshysynyń atynan mereitoilyq medaldardy Konstitýtsiialyq Sot Tóraǵasynyń orynbasary Baqyt Nurmuhanov Maqsut Narikbayev University alańynda ótken konferentsiianyń sessiiasy barysynda, sondai-aq Konstitýtsiialyq Sottyń sýdiasy Erkin Ońǵarbaev L.N.Gýmilev atyndaǵy Eýraziia ulttyq ýniversitetiniń bazasynda ótken konferentsiianyń sessiiasy sheńberinde eńbek sińirgen adamdarǵa tabys etti.
