الداعى كۇندەرى ششۋچينسك تۇرعىندارى نارازىلىق ميتينگىسىنە شىقپاق. اۋدان اكىمدىگىنە ءوتىنىش بەرىپ تە قويعان. ماقسات – پروكۋراتۋرا مەن جەر رەسۋرستارىن باسقارۋ دەپارتامەنتى جيىرما جىل بۇرىن بەرىلگەن جەر ۋچاسكەلەرىن تارتىپ الماقشى ەكەنىن پرەزيدەنت پەن ۇكىمەت نازارىنا جەتكىزۋ دەپ حابارلايدى Dalanews.kz.

ميتينگ ۇيىمداستىرۋشىسى سەرگەي باۋەر جاعدايدى بىلايشا سيپاتتادى:

– مەنىڭ باسىمدا ەكى ۋچاسكە بار. بىرەۋى – مۇراگەرلىكپەن كەلگەن جەر. بىلتىر ءوزىن جەر كوميتەتىنىڭ باسشىسىمىن دەپ تانىستىرعان ايەل كەلىپ: «مەملەكەتكە جەردى ءوز ەركىڭىزبەن قايتارىڭىز، ايتپەسە سوت ارقىلى الامىز»، – دەدى. العاشىندا قالجىڭ دەپ قابىلدادىم. كەيىن قىزمەتكەرلەرى ءۇيىمنىڭ، كورشىلەرىمنىڭ ۋچاسكەلەرىن ولشەي باستادى. جەردى بوساتۋدى تالاپ ەتكەن حات بارلىق تۇرعىندار مەن كاسىپكەرلەرگە جەتتى. ءبىز بۇل جەرگە كەزدەيسوق قونىستانعان جوقپىز، قولىمىزدا وسىدان 20 جىل بۇرىن مەملەكەتتىڭ ءوزى بەرگەن زاڭدى قۇجاتتارىمىز بار.

پروكۋراتۋرانىڭ بىلتىرعى تەكسەرىسى بويىنشا، بۇل اۋماقتار بۋراباي ۇلتتىق تابيعي پاركىنىڭ جەرىنە كىرەدى-مىس. ءقازىر سوت پروسەستەرى باستالىپ كەتكەن.

الايدا زاڭگەر ساپار قۇسايىنوۆ بۇل سوتتاردا زاڭبۇزۋشىلىق كوپ ەكەنىن العا تارتتى:

– اقمولا وبلىسىنىڭ جەر رەسۋرستارىن باسقارۋ دەپارتامەنتىنىڭ سوتقا تالاپ ارىز تۇسىرۋگە مۇلدەم قۇقىعى جوق. جەر كودەكسىنىڭ 148-بابى بويىنشا، اتالعان دەپارتامەنت جەكە ازاماتتار مەن اكىمدىك اراسىنداعى كەلىسىمدەردى جارامسىز دەپ تانۋ تۋرالى ارىز بەرە المايدى. سويتە تۇرا، سوت مۇنداي زاڭسىزدىققا كوز جۇمىپ قاراپ وتىر. بۋرابايدىڭ وزىندە 1300-دەن استام جەر يەسى بار. بۇدان بولەك سۆەتلىي، زەلەنىي بور اۋىلدارىنداعى تۇرعىندار دا قيىندىققا تاپ بولۋى ىقتيمال.

ونىڭ ايتۋىنشا، بۋراباي ۇلتتىق پاركىنىڭ جەر اكتىسى 2019 جىلى عانا الىنعان. ەگەر ادامدار وسى جەردى 20 جىل بۇرىن زاڭدى تۇردە يەمدەنگەن بولسا، كەيىن بۇل جەرلەردىڭ باسقاعا بەرىلۋى زاڭعا سىيمايدى. ونىڭ ۇستىنە، ءۇش جىلدىق تالاپ مەرزىمى دە الدەقاشان ءوتىپ كەتكەن.

– جوعارعى سوتتىڭ نورماتيۆتىك قاۋلىسىنا سايكەس، بۇل ماسەلە تەك اكىمشىلىك سوتتا قارالۋى ءتيىس. ءبىراق دەپارتامەنت وعان بارۋدان باس تارتىپ وتىر. سەبەبى، بىرىنشىدەن، ولار ارىز بەرۋ مەرزىمىن وتكىزىپ العان، ەكىنشىدەن، اكىمشىلىك سوتتا مەملەكەتتىك ورگاننىڭ قاتەلىگى ءۇشىن قاراپايىم حالىق زارداپ شەكپەيدى، – دەيدى زاڭگەر.

سەرگەي باۋەر وسىدان جارتى جىل بۇرىن جەرگىلىكتى بيلىكتىڭ ۋادەسىنە سەنىپ قالعاندارىن وكىنىشپەن جەتكىزدى:

– اقپان ايىندا 150-دەي تۇرعىن اۋدان اكىمى، پروكۋرور مەن جەر ءبولىمىنىڭ ماماندارىمەن كەزدەسكەن ەدىك. ولار «ەشكىمنىڭ جەرىن تارتىپ المايمىز» دەپ سەندىردى. سول كەزدە سەندىك. ءقازىر ءبارى جالعان ەكەنىنە كوزىمىز جەتتى. سوندىقتان ميتينگىگە شىقپاقپىز. شەنەۋنىكتەر حالىققا جاعدايدى ءتۇسىندىرسىن. 20 جىلدان اسا زاڭدى يەلىكتەگى جەرىمىزدى ءبىر كۇندە جوعالتىپ، دالادا قالعىمىز كەلمەيدى.