Алдағы күндері Щучинск тұрғындары наразылық митингісіне шықпақ. Аудан әкімдігіне өтініш беріп те қойған. Мақсат – прокуратура мен жер ресурстарын басқару департаменті жиырма жыл бұрын берілген жер учаскелерін тартып алмақшы екенін президент пен үкімет назарына жеткізу деп хабарлайды Dalanews.kz.
Митинг ұйымдастырушысы Сергей Бауэр жағдайды былайша сипаттады:
– Менің басымда екі учаске бар. Біреуі – мұрагерлікпен келген жер. Былтыр өзін жер комитетінің басшысымын деп таныстырған әйел келіп: «Мемлекетке жерді өз еркіңізбен қайтарыңыз, әйтпесе сот арқылы аламыз», – деді. Алғашында қалжың деп қабылдадым. Кейін қызметкерлері үйімнің, көршілерімнің учаскелерін өлшей бастады. Жерді босатуды талап еткен хат барлық тұрғындар мен кәсіпкерлерге жетті. Біз бұл жерге кездейсоқ қоныстанған жоқпыз, қолымызда осыдан 20 жыл бұрын мемлекеттің өзі берген заңды құжаттарымыз бар.
Прокуратураның былтырғы тексерісі бойынша, бұл аумақтар Бурабай ұлттық табиғи паркінің жеріне кіреді-мыс. Қазір сот процестері басталып кеткен.
Алайда заңгер Сапар Құсайынов бұл соттарда заңбұзушылық көп екенін алға тартты:
– Ақмола облысының жер ресурстарын басқару департаментінің сотқа талап арыз түсіруге мүлдем құқығы жоқ. Жер кодексінің 148-бабы бойынша, аталған департамент жеке азаматтар мен әкімдік арасындағы келісімдерді жарамсыз деп тану туралы арыз бере алмайды. Сөйте тұра, сот мұндай заңсыздыққа көз жұмып қарап отыр. Бурабайдың өзінде 1300-ден астам жер иесі бар. Бұдан бөлек Светлый, Зеленый Бор ауылдарындағы тұрғындар да қиындыққа тап болуы ықтимал.
Оның айтуынша, Бурабай ұлттық паркінің жер актісі 2019 жылы ғана алынған. Егер адамдар осы жерді 20 жыл бұрын заңды түрде иемденген болса, кейін бұл жерлердің басқаға берілуі заңға сыймайды. Оның үстіне, үш жылдық талап мерзімі де әлдеқашан өтіп кеткен.
– Жоғарғы соттың нормативтік қаулысына сәйкес, бұл мәселе тек әкімшілік сотта қаралуы тиіс. Бірақ департамент оған барудан бас тартып отыр. Себебі, біріншіден, олар арыз беру мерзімін өткізіп алған, екіншіден, әкімшілік сотта мемлекеттік органның қателігі үшін қарапайым халық зардап шекпейді, – дейді заңгер.
Сергей Бауэр осыдан жарты жыл бұрын жергілікті биліктің уәдесіне сеніп қалғандарын өкінішпен жеткізді:
– Ақпан айында 150-дей тұрғын аудан әкімі, прокурор мен жер бөлімінің мамандарымен кездескен едік. Олар «ешкімнің жерін тартып алмаймыз» деп сендірді. Сол кезде сендік. Қазір бәрі жалған екеніне көзіміз жетті. Сондықтан митингіге шықпақпыз. Шенеуніктер халыққа жағдайды түсіндірсін. 20 жылдан аса заңды иеліктегі жерімізді бір күнде жоғалтып, далада қалғымыз келмейді.
