Aldaǵy kúnderi Shýchinsk turǵyndary narazylyq mitingisine shyqpaq. Aýdan ákimdigine ótinish berip te qoiǵan. Maqsat – prokýratýra men jer resýrstaryn basqarý departamenti jiyrma jyl buryn berilgen jer ýchaskelerin tartyp almaqshy ekenin prezident pen úkimet nazaryna jetkizý dep habarlaidy Dalanews.kz.
Miting uiymdastyrýshysy Sergei Baýer jaǵdaidy bylaisha sipattady:
– Meniń basymda eki ýchaske bar. Bireýi – muragerlikpen kelgen jer. Byltyr ózin jer komitetiniń basshysymyn dep tanystyrǵan áiel kelip: «Memleketke jerdi óz erkińizben qaitaryńyz, áitpese sot arqyly alamyz», – dedi. Alǵashynda qaljyń dep qabyldadym. Keiin qyzmetkerleri úiimniń, kórshilerimniń ýchaskelerin ólshei bastady. Jerdi bosatýdy talap etken hat barlyq turǵyndar men kásipkerlerge jetti. Biz bul jerge kezdeisoq qonystanǵan joqpyz, qolymyzda osydan 20 jyl buryn memlekettiń ózi bergen zańdy qujattarymyz bar.
Prokýratýranyń byltyrǵy tekserisi boiynsha, bul aýmaqtar Býrabai ulttyq tabiǵi parkiniń jerine kiredi-mys. Qazir sot protsesteri bastalyp ketken.
Alaida zańger Sapar Qusaiynov bul sottarda zańbuzýshylyq kóp ekenin alǵa tartty:
– Aqmola oblysynyń jer resýrstaryn basqarý departamentiniń sotqa talap aryz túsirýge múldem quqyǵy joq. Jer kodeksiniń 148-baby boiynsha, atalǵan departament jeke azamattar men ákimdik arasyndaǵy kelisimderdi jaramsyz dep taný týraly aryz bere almaidy. Sóite tura, sot mundai zańsyzdyqqa kóz jumyp qarap otyr. Býrabaidyń ózinde 1300-den astam jer iesi bar. Budan bólek Svetlyi, Zelenyi Bor aýyldaryndaǵy turǵyndar da qiyndyqqa tap bolýy yqtimal.
Onyń aitýynsha, Býrabai ulttyq parkiniń jer aktisi 2019 jyly ǵana alynǵan. Eger adamdar osy jerdi 20 jyl buryn zańdy túrde iemdengen bolsa, keiin bul jerlerdiń basqaǵa berilýi zańǵa syimaidy. Onyń ústine, úsh jyldyq talap merzimi de áldeqashan ótip ketken.
– Joǵarǵy sottyń normativtik qaýlysyna sáikes, bul másele tek ákimshilik sotta qaralýy tiis. Biraq departament oǵan barýdan bas tartyp otyr. Sebebi, birinshiden, olar aryz berý merzimin ótkizip alǵan, ekinshiden, ákimshilik sotta memlekettik organnyń qateligi úshin qarapaiym halyq zardap shekpeidi, – deidi zańger.
Sergei Baýer osydan jarty jyl buryn jergilikti biliktiń ýádesine senip qalǵandaryn ókinishpen jetkizdi:
– Aqpan aiynda 150-dei turǵyn aýdan ákimi, prokýror men jer bóliminiń mamandarymen kezdesken edik. Olar «eshkimniń jerin tartyp almaimyz» dep sendirdi. Sol kezde sendik. Qazir bári jalǵan ekenine kózimiz jetti. Sondyqtan mitingige shyqpaqpyz. Sheneýnikter halyqqa jaǵdaidy túsindirsin. 20 jyldan asa zańdy ieliktegi jerimizdi bir kúnde joǵaltyp, dalada qalǵymyz kelmeidi.
