بۇگىن، 29 تامىزدا، قازاقستان رەسپۋبليكاسى كونستيتۋسيالىق سوتىنىڭ ءتورايىمى ەلۆيرا ءابىلحاسىم قىزى ازيموۆا كونستيتۋسيانىڭ 30 جىلدىعىنا ارنالعان عىلىمي-پراكتيكالىق كونفەرەنسيادا ءسوز سويلەدى، دەپ حابارلايدى Dalanews.kz.
ونىڭ ايتۋىنشا، كونستيتۋسيالىق سوتتىڭ باستى مىندەتى – زاڭدار مەن وزگە دە نورماتيۆتىك-قۇقىقتىق اكتىلەردىڭ كونستيتۋسياعا سايكەستىگىن تەكسەرۋ. بۇل وكىلەتتىكتى ازاماتتارمەن قاتار، ادام قۇقىقتارى جونىندەگى ۋاكىل مەن باس پروكۋرور دا پايدالانا الادى. مۇنداي مۇمكىندىك 2022 جىلعى كونستيتۋسيالىق رەفورمادان كەيىن بەرىلگەن.
«2023 جىلعى قاڭتاردان 2025 جىلعى تامىزعا دەيىن كونستيتۋسيالىق سوتقا ازاماتتاردان 11 مىڭنان استام ءوتىنىش ءتۇستى. ولاردى قاراۋ بارىسىندا 5 مىڭنان استام قۇقىقتىق نورما زەردەلەنىپ، 400-دەن استام قاۋلى قابىلداندى. سونىڭ ىشىندە 74 شەشىم كونستيتۋسياعا سايكەستىگىن تەكسەرۋدىڭ ناتيجەسىندە قابىلدانعان قورىتىندى قاۋلىلار بولىپ تابىلادى»، – دەدى ەلۆيرا ازيموۆا.
كونفەرەنسيا بارىسىندا كونستيتۋسيالىق سوتتىڭ قوعامداعى ءرولى مەن ازاماتتاردىڭ قۇقىقتارىن قورعاۋداعى ماڭىزى ەرەكشە اتاپ ءوتىلدى.
