Бүгін, 29 тамызда, Қазақстан Республикасы Конституциялық Сотының төрайымы Эльвира Әбілхасымқызы Азимова Конституцияның 30 жылдығына арналған ғылыми-практикалық конференцияда сөз сөйледі, деп хабарлайды Dalanews.kz.

Оның айтуынша, Конституциялық Соттың басты міндеті – заңдар мен өзге де нормативтік-құқықтық актілердің Конституцияға сәйкестігін тексеру. Бұл өкілеттікті азаматтармен қатар, Адам құқықтары жөніндегі уәкіл мен Бас прокурор да пайдалана алады. Мұндай мүмкіндік 2022 жылғы конституциялық реформадан кейін берілген.

«2023 жылғы қаңтардан 2025 жылғы тамызға дейін Конституциялық Сотқа азаматтардан 11 мыңнан астам өтініш түсті. Оларды қарау барысында 5 мыңнан астам құқықтық норма зерделеніп, 400-ден астам қаулы қабылданды. Соның ішінде 74 шешім Конституцияға сәйкестігін тексерудің нәтижесінде қабылданған қорытынды қаулылар болып табылады», – деді Эльвира Азимова.

Конференция барысында Конституциялық Соттың қоғамдағы рөлі мен азаматтардың құқықтарын қорғаудағы маңызы ерекше атап өтілді.