باتىس قازاقستان وبلىسىندا “Chia Tai Pharmaceutical” قارجىلىق پيراميداسىن ۇيىمداستىرۋشىنىڭ كىناسى دالەلدەندى. ونىڭ باسشىسى سالىمشىلاردان زاڭسىز اقشا جيناپ، 185 جابىرلەنۋشىگە جالپى سوماسى 180 ميلليون تەڭگەدەن استام شىعىن كەلتىرگەن، دەپ حابارلايدى Dalanews.kz.

2022 جىلدىڭ قىركۇيەگىنەن 2023 جىلدىڭ ساۋىرىنە دەيىن شىڭعىرلاۋ اۋدانىنىڭ تۇرعىنى “Chia Tai Pharmaceutical”كومپانياسىنىڭ اتىن جامىلىپ، فارماسيەۆتيكالىق كاسىپورىنعا زاڭدى ينۆەستيسيا سالۋ ارقىلى جوعارى پايدا تابۋعا ۋادە بەرگەن. الايدا بۇل جالعان اقپارات بولىپ، ونىڭ ماقساتى – سالىمشىلاردان زاڭسىز قاراجات جيناۋ ەكەنى انىقتالدى.

"فارماسيەۆتيكالىق زاۋىتقا زاڭدى ينۆەستيسيا سالامىز دەگەن جالعان اتاۋمەن ول فارماسيەۆتيكالىق كاسىپورىن قىزمەتىنەن جوعارى كىرىس الۋعا ۋادە بەرىپ، سالىمشىلاردان زاڭسىز قاراجات تارتقان. ونىڭ قىلمىستىق ارەكەتىنىڭ ناتيجەسىندە 185 جابىرلەنۋشىگە جالپى سوماسى 180 ميلليون تەڭگەدەن استام ماتەريالدىق شىعىن كەلتىرىلگەن. ءبورلى اۋداندىق پروكۋراتۋراسىنىڭ مەملەكەتتىك ايىپتاۋشىسىنىڭ ءپرينسيپتى ۇستانىمىن ەسكەرە وتىرىپ، سوتتالۋشىنىڭ قارجىلىق پيراميدانى قۇرۋ جانە باسقارۋ، سونداي-اق قىلمىستىق جولمەن الىنعان اقشا مەن باسقا دا مۇلىكتى زاڭداستىرۋ بويىنشا كىناسى تولىق دالەلدەندى. 180 ميلليون تەڭگەدەن استام كەلتىرىلگەن شىعىن جابىرلەنۋشىلەردىڭ پايداسىنا تولىعىمەن ءوندىرىلدى"، – دەلىنگەن باس پروكۋراتۋرانىڭ حابارلاماسىندا. 

سوت مەملەكەتتىك ايىپتاۋشىنىڭ ۇستانىمىمەن كەلىسە وتىرىپ، سوتتالۋشىنى قازاقستان رەسپۋبليكاسى قىلمىستىق كودەكسىنىڭ 217-باپتىڭ 2-بولىگى 2-تارماعى (قارجىلىق (ينۆەستيسيالىق) پيراميدانى قۇرۋ جانە باسقارۋ)، 218-باپتىڭ 2-بولىگى 3-تارماعىندا (قىلمىستىق جولمەن الىنعان اقشانى جانە (نەمەسە) وزگە مۇلىكتى زاڭداستىرۋ (جىلىستاتۋ)) كوزدەلگەن قىلمىستاردى جاساعانى ءۇشىن كىنالى دەپ تاۋىپ،قىلمىستىق قۇقىق بۇزۋشىلىقتىڭ جيىنتىعىمەن 5 جىل مەرزىمگە قارجى ۇيىمدارىندا باسشى لاۋازىمداردى اتقارۋ جانە قارجى ۇيىمىنىڭ قاتىسۋشىسى بولۋ قۇقىعىنان ايىرا وتىرىپ 5 جىلعا باس بوستاندىعىنان ايىرۋ تۇرىندەگى جازا تاعايىندادى.

سوت ۇكىمى زاڭدى كۇشىنە ەندى.