الماتى ماڭىندا جەر سىلكىنىسى كەزىندە باس ساۋعالايتىن ارنايى لاگەر سالىنباق. بۇل تۋرالى ءماجىلىس وتىرىسىندا توتەنشە جاعداي ءمينيسترى شىڭعىس ءارىنوۆ مالىمدەدى، - دەپ حابارلايدى Dalanews.kz.
شىڭعىس ءارىنوۆ مينيسترلىكتىڭ جەدەل ماقساتتاعى “الاتاۋ” وڭتۇستىك بازاسىنىڭ قۇرىلعانىن ايتتى.
“جويقىن جەر سىلكىنىسى بولعان جاعدايدا الماتى ماڭىندا زارداپ شەككەندەر ءۇشىن شاتىرلى لاگەر قۇرىلادى. سونداي-اق گۋمانيتارلىق كومەكتى قابىلداۋ پۋنكتەرى مەن باسقا دا قاجەت قوسالقى نىساندار بولادى”، – دەدى ۆەدوسمستۆو باسشىسى.
ءمينيستردىڭ سوزىنشە، لاگەردىڭ باستى ارتىقشىلىعى - 173 گەكتار اشىق جەر.
“بۇل جەر وپىرىرىلمايدى جانە ول جارىقتارى جوق ۇستىرتتە ورنالاسقان. وندا كىرەتىن جولدار بار جانە جاقىن جەردە تەمىر جول ورنالاسقان. ءبىز سوندا ترەنينگ وتكىزەمىز. ول جاقتا شاتىرلار جەتكىلىكتى. وعان قوسا، مەملەكەتتىك ماتەريالدىق رەزەرۆ جۇيەسىنىڭ نومەنكلاتۋراسىندا ءبىز مىندەتتى تۇردە شاتىرلار، توسەك-ورىندار، ارقاعا اساتىن سومكەلەر بەرەمىز. مۇنىڭ ءبارى قانداي دا ءبىر دەربەستىك بولۋى ءۇشىن كەرەك. تاعى ءبىر شەشىلمەگەن ماسەلە بار. ءبىز ءار زارداپ شەققان ادامعا تەرميكالىق ىشكيىم مەن جىلى كيىم جانە بارلىق قورعانىس قۇرالدارىنىڭ بەرىلۋىن قامتاماسىز ەتۋگە كوشەمىز. ءار 10 ادامدا مەديسينالىق قوبديشا بولادى. سونداي-اق العاشقى مەديسينالىق كومەك كورسەتە الاتىن دارىگەرلەر دە بولادى دەپ ۇمىتتەنەمىز. سونىمەن قاتار وندا شاتىرلار، ۇيىقتاۋعا ارنالعان قاپتار، قۇرال-جابدىقتار جانە ءۇش كۇنگە جەتەتىن ازىق-تۇلىك بولادى”، – دەيدى شىڭعىس ءارىنوۆ.
مينيستر ادامدار ءجيى-جيى ورنالاسسا، بازادا 50 مىڭ ادام سىياتىن ورىن بارىن ايتادى.
“ادامداردىڭ سىيىمدىلىعىن 1 ميلليون ورىنعا جەتكىزسەك دەيمىز. تەك الماتى ماڭىندا ەمەس، باسقا قالالاردىڭ جانىنان دا وسىنداي ءقاۋىپسىز جەر ىزدەپ جاتىرمىز”، – دەدى ءارىنوۆ.
