الماتى اكىمى ەربولات دوسايەۆ رەسپۋبليكا كۇنى قارساڭىندا تۇركسىب ۋدانىنىڭ نۇرشاشقان شاعىن اۋدانىندا اشىلعان جاڭا زاماناۋي وتباسىلىق-دارىگەرلىك امبۋلاتورياعا (ودا) باردى.

جاڭا امبۋلاتوريا پايدا بولعانعا دەيىن شاعىن اۋدان تۇرعىندارىنا 1975 جىلى سالىنعان 52 شارشى مەتر ەسكىرگەن عيماراتتا قىزمەت كورسەتىلدى. ول زاماناۋي ستاندارتتارعا سايكەس كەلمەدى جانە ۇزاق ۋاقىت بويى اۋىستىرۋدى قاجەت ەتتى. قابىلداۋ تەك فەلدشەرلىك-اكۋشەرلىك باعىتتا جۇرگىزىلدى. كەشەندى مەديسينالىق كومەك الۋ ءۇشىن پاسيەنتتەر جۇلدىز-1 ش/ا ورنالاسقان №20 ەمحانانىڭ نەگىزگى كورپۋسىنا بارۋعا ءماجبۇر بولدى.

جاڭا دارىگەرلىك امبۋلاتوريا № 20 قالالىق ەمحانانىڭ فيليالى بولىپ تابىلادى جانە اۋىسىمىنا 100 كەلۋشىگە ەسەپتەلگەن. مەديسينالىق مەكەمە العاشقى مەديسينالىق جانە دارىگەرگە دەيىنگى كومەك كورسەتۋ ءۇشىن بارلىق قاجەتتى قۇرىلعىلارمەن جابدىقتالعان. سونداي-اق ازاماتتاردىڭ موبيلدىلىگى تومەن توبى ءۇشىن مىندەتتى شارتتار ساقتالدى: پاندۋستار، ىڭعايلى ەسىك ويىقتارى جانە بەيىمدەلگەن سانيتارلىق توراپتار.

اۋدانى 1،4 مىڭ شارشى مەتر ەكى قاباتتى عيماراتتا پەدياتريا، جالپى پراكتيكا دارىگەرلەرى، ۆاكسيناسيا، شۇعىل جانە كونسۋلتاسيالىق-دياگنوستيكالىق كومەك بولىمشەلەرى، كۇندىزگى ستاسيونار ورنالاسقان.

جاڭا امبۋلاتوريا شاعىن اۋداننىڭ بەكىتىلگەن تۇرعىندارىنا قىزمەت كورسەتەدى، وسىلايشا تۇرعىنداردىڭ مەديسينالىق قىزمەتكە دەگەن قاجەتتىلىگىن جابادى.

«مەن نۇرشاشقان شاعىن اۋدانىندا تۇرامىن. ءبىز جاڭا زاماناۋي امبۋلاتوريانىڭ اشىلعانىنا وتە قۋانىشتىمىز جانە ريزامىز، بۇرىن بىزگە وتە الىس ورنالاسقان ەمحاناعا جەتۋ قيىن بولدى، جۇلدىز شاعىن اۋدانىنا بارۋعا تۋرا كەلدى. ءقازىر ءبىز ءۇشىن مەديسينالىق كومەك قولجەتىمدى بولدى، دارىگەرلەر جاقىن جەردە، ءبىز ىڭعايلى ۋاقىتتا كەلەمىز، ەمدەلەمىز، ءدارى - دارمەك الامىز»، - دەدى ناۋقاس تۇرسىنحان رادجيبايەۆا.

ايتا كەتۋ كەرەك، نۇرشاشقان ش/ا-دا جاڭا ودا اشىلعاننان كەيىن مەديسينالىق قىزمەت كورسەتىلەتىن حالىقتى قايتا ءبولىپ، №20 ەمحانانىڭ نەگىزگى كورپۋسىن كۇردەلى جوندەۋدى باستادى. ەمحانا عيماراتىن جوندەۋ 2008 جىلى پايدالانۋعا بەرىلگەن ساتتەن باستاپ جۇرگىزىلگەن جوق. جۇمىستاردى اياقتاۋ 2025 جىلدىڭ ناۋرىزىنا جوسپارلانعان.