Almaty ákimi Erbolat Dosaev Respýblıka kúni qarsańynda Túrksib ýdanynyń Nurshashqan shaǵyn aýdanynda ashylǵan jańa zamanaýı otbasylyq-dárigerlik ambýlatorıaǵa (ODA) bardy.

Jańa ambýlatorıa paıda bolǵanǵa deıin shaǵyn aýdan turǵyndaryna 1975 jyly salynǵan 52 sharshy metr eskirgen ǵımaratta qyzmet kórsetildi. Ol zamanaýı standarttarǵa sáıkes kelmedi jáne uzaq ýaqyt boıy aýystyrýdy qajet etti. Qabyldaý tek feldsherlik-akýsherlik baǵytta júrgizildi. Keshendi medısınalyq kómek alý úshin pasıentter Juldyz-1 sh/a ornalasqan №20 emhananyń negizgi korpýsyna barýǵa májbúr boldy.

Jańa dárigerlik ambýlatorıa № 20 qalalyq emhananyń fılıaly bolyp tabylady jáne aýysymyna 100 kelýshige eseptelgen. Medısınalyq mekeme alǵashqy medısınalyq jáne dárigerge deıingi kómek kórsetý úshin barlyq qajetti qurylǵylarmen jabdyqtalǵan. Sondaı-aq azamattardyń mobıldiligi tómen toby úshin mindetti sharttar saqtaldy: pandýstar, yńǵaıly esik oıyqtary jáne beıimdelgen sanıtarlyq toraptar.

Aýdany 1,4 myń sharshy metr eki qabatty ǵımaratta Pedıatrıa, Jalpy praktıka dárigerleri, vaksınasıa, shuǵyl jáne konsýltasıalyq-dıagnostıkalyq kómek bólimsheleri, kúndizgi stasıonar ornalasqan.

Jańa ambýlatorıa shaǵyn aýdannyń bekitilgen turǵyndaryna qyzmet kórsetedi, osylaısha turǵyndardyń medısınalyq qyzmetke degen qajettiligin jabady.

«Men Nurshashqan shaǵyn aýdanynda turamyn. Biz jańa zamanaýı ambýlatorıanyń ashylǵanyna óte qýanyshtymyz jáne rızamyz, buryn bizge óte alys ornalasqan emhanaǵa jetý qıyn boldy, Juldyz shaǵyn aýdanyna barýǵa týra keldi. Qazir biz úshin medısınalyq kómek qoljetimdi boldy, dárigerler jaqyn jerde, biz yńǵaıly ýaqytta kelemiz, emdelemiz, dári - dármek alamyz», - dedi naýqas Tursynhan Radjıbaeva.

Aıta ketý kerek, Nurshashqan sh/a-da jańa ODA ashylǵannan keıin medısınalyq qyzmet kórsetiletin halyqty qaıta bólip, №20 emhananyń negizgi korpýsyn kúrdeli jóndeýdi bastady. Emhana ǵımaratyn jóndeý 2008 jyly paıdalanýǵa berilgen sátten bastap júrgizilgen joq. Jumystardy aıaqtaý 2025 jyldyń naýryzyna josparlanǵan.