سەمەيدە 12،5 مىڭ كورەرمەنگە ارنالعان جاڭا فۋتبول ستاديونى قۇرىلىسىنىڭ باستالۋىنا وراي سالتاناتتى تۇردە كاپسۋلا سالىندى، دەپ حابارلايدى Dalanews.kz.
بولاشاق زاماناۋي سپورت ارەناسى ۇزاق جىلدار قاراۋسىز قالعان ەسكى «پيششيەۆيك» ستاديونىنىڭ ورنىندا سالىنادى. ءقازىر دايىندىق جۇمىستارى باستالىپ كەتتى. اۋقىمدى جوبانى اياقتاۋ 2026 جىلعا جوسپارلانعان.
شاراعا قاتىسقان ايماق باسشىسى نۇرلان ۇرانحايەۆ جاڭا ستاديوننىڭ سالىنۋى سەمەي قالاسىنىڭ سپورتىنا ايتارلىقتاي ىلگەرىلەۋدەن بولەك، ەكونوميكانىڭ دامۋىنا سەرپىن بەرەتىندىگىن اتاپ ءوتتى. ارەنانىڭ زاماناۋي ديزاينى مەن سىيىمدىلىعى ۋەفا تالاپتارى مەن ستاندارتتارىنا سايكەس كەلەدى.
جاڭا ستاديون تەك فۋتبول ماچتارىن عانا ەمەس، ءىرى مادەني جانە سپورتتىق شارالاردى دا وتكىزەتىن وڭىردەگى باستى سپورت نىسانىنا اينالادى. بۇل سەمەيدىڭ فۋتبول تاريحىن قايتا جاڭعىرتۋ مەن ونىڭ قازاقستانداعى جەتەكشى سپورت ورتالىقتارىنىڭ ءبىرى رەتىندە ورالۋىنا ماڭىزدى ۇلەس ەكەنىن اتاپ ءوتۋ كەرەك.
