Semeide 12,5 myń kórermenge arnalǵan jańa fýtbol stadiony qurylysynyń bastalýyna orai saltanatty túrde kapsýla salyndy, dep habarlaidy Dalanews.kz.
Bolashaq zamanaýi sport arenasy uzaq jyldar qaraýsyz qalǵan eski «Pishevik» stadionynyń ornynda salynady. Qazir daiyndyq jumystary bastalyp ketti. Aýqymdy jobany aiaqtaý 2026 jylǵa josparlanǵan.
Sharaǵa qatysqan aimaq basshysy Nurlan Uranhaev jańa stadionnyń salynýy Semei qalasynyń sportyna aitarlyqtai ilgerileýden bólek, ekonomikanyń damýyna serpin beretindigin atap ótti. Arenanyń zamanaýi dizainy men syiymdylyǵy ÝEFA talaptary men standarttaryna sáikes keledi.
Jańa stadion tek fýtbol matchtaryn ǵana emes, iri mádeni jáne sporttyq sharalardy da ótkizetin óńirdegi basty sport nysanyna ainalady. Bul Semeidiń fýtbol tarihyn qaita jańǵyrtý men onyń Qazaqstandaǵy jetekshi sport ortalyqtarynyń biri retinde oralýyna mańyzdy úles ekenin atap ótý kerek.
