QR IIM Bárimbek Beisenov atyndaǵy Qaraǵandy akademiiasynyń 4-kýrs kýrsanty, bokstan Qazaqstan Respýblikasynyń sport sheberi Baýyrjan Áli otandyq sportty damytýǵa qosqan úlesi úshin «Qurmetti sport qyzmetkeri» tósbelgisimen jáne Qurmet gramotasymen marapattaldy, dep habarlaidy dalanews.kz.
Jas sportshynyń bul jetistigi onyń sporttaǵy tabandylyǵy men kásibi daiarlyqtaǵy joǵary jaýapkershiliginiń jemisi sanalady. Baýyrjan Áli kýrsanttyq ómirdiń qatań tártibi men kásibi sporttaǵy talaptardy qatar alyp júrip, ózgelerge úlgi bolarlyq nátijelerge qol jetkizip keledi.
Bolashaq politsiia ofitseriniń kúndelikti ómiri tańǵy saptyq daiyndyqtan bastalyp, áskeri jattyǵýlar, dárister men qyzmettik mindetterge ulasady. Soǵan qaramastan, ol sporttyq jattyǵýlaryn úzbei, bokstaǵy sheberligin shyńdaýdy jalǵastyryp keledi.
Baýyrjan Álidiń aitýynsha, akademiia qabyrǵasynda qalyptasqan tártip pen jaýapkershilik sporttaǵy jetistikterge jetýge kómektesse, ringte shyńdalǵan qaisarlyq qyzmet barysynda da úlken paidasyn tigizedi.
«Jabyq vedomstvolyq joǵary oqý ornyndaǵy oqý men kásibi boksty qatar alyp júrý – úlken jaýapkershilik. Qaraǵandy akademiiasynda úirengen temirdei tártip maǵan ringtegi kez kelgen synaqqa tótep berýge kómektesedi. Al sporttaǵy qaisarlyq qyzmette de óz septigin tigizedi. Bul marapattar – bapkerlerimniń, tálimgerlerimniń jáne týǵan akademiiamnyń ortaq jeńisi», – dedi sportshy.
Tórtinshi kýrs kýrsantyna «Qurmetti sport qyzmetkeri» ataǵynyń berilýi onyń sporttaǵy joǵary nátijeleri men erik-jigeriniń aiqyn kórinisi retinde baǵalanyp otyr.
Búginde Baýyrjan Áli tek bolashaq tártip saqshylary úshin ǵana emes, sport pen bilimdi qatar alyp júrýge umtylatyn qazaqstandyq jastar úshin de tabandylyqtyń, eńbekqorlyqtyń jáne maqsatqa adaldyqtyń úlgisine ainalyp keledi.
