Quryltai tóraǵasynyń orynbasary Daniia Espaeva Kólik vitse-ministri Damir Qojahmetovke depýtattardyń suraqtaryna otyrys barysynda naqty jaýap berýge shaqyryp, eskertý jasady. Oqiǵa "2027-2029 jyldarǵa arnalǵan respýblikalyq biýdjet týraly" zań jobasynyń tanystyrylymy kezinde bolǵan, dep habarlaidy dalanews.kz.
Espaevanyń eskertý jasaýyna depýtat saýalyna berilgen jaýap sebep boldy. Damir Qojahmetov qajetti aqparatty keiin jazbasha túrde usynatynyn aitqan. Alaida vitse-spiker úsh jyldyq biýdjet talqylanyp jatqanda memlekettik organdar ózderine qatysty negizgi kórsetkishter men shyǵystardy aldyn ala bilýge tiis ekenin atap ótti.
"Búgin biz úsh jyldyq biýdjetti qarap jatqan otyrysta jazbasha jaýap beremin deýińiz durys emes", - dedi ol.
Espaevanyń sózinshe, qoiylǵan saýal Kólik ministrliginiń shyǵystaryna qatysty bolǵan jáne oǵan sol jerde jaýap berýge múmkindik bolǵan.
"Suraq óte qarapaiym bolatyn. Tym qarapaiym. Bul sizderdiń shyǵystaryńyzǵa qatysty edi. Ony bárinen de jaqsy bilýlerińiz kerek", - dep málimdedi ol.
Budan keiin Daniia Espaeva otyrysqa qatysyp otyrǵan basqa vitse-ministrlerge de úndeý jasap, depýtattardyń saýaldaryna tolyq ári naqty jaýap berýge shaqyrdy. Ol jazbasha jaýap berýmen shektelmeý keregin eskertti.
"Jazbasha jaýap qabyldanbaidy. Otyrys bolatynyn, tanystyrylym jasalatynyn aldyn ala eskerttik. Árkim daiyn bolýy kerek", - dep atap ótti vitse-spiker.
Espaeva memlekettik organ ókilderine otyrystyń formaty men úsh jyldyq biýdjet jobasynyń tanystyrylymy jóninde aldyn ala habarlanǵanyn da eske saldy.
